Saimir Tahiri u rishfaq para mediave me pot ë njëjtat mesazhe, ato të një pafajësie të nëpërkëmbur sipas tij nga gjuha politike, e sigurisht nga drejtësia.
Gjykata e Krimeve të Rënda vendosi të pranojë kërkesën e tij duke rrëzuar vendimin e Prokurorisë për të shtyrë për të katërtën herë me tre muaj hetimet që kanë në qendër personin e tij, e kjo i dha ish-ministrit të Rendit të akuzuar për trafik droge në kuadër të grupit “Habilaj” edhe më tepër zemër.
“Kjo histori nuk mund të zgjasë pa fund. Deri më 10 mars koha numërohet mbrapsht, ka kohë deri atëherë. Nuk e shoh si lojë golash, e shoh si mundësinë time për të marrë drejtësinë që më takon.
Kam mbajtur në kurriz akuza nga më të rëndomtat. Kam pritur një vit e ca pa folur që drejtësia të flasë, me të gjitha akuzat politike me të cilat s’po merrem. Merre me mend se çfarë ndodh me qytetarët e thjeshtë, kur kjo ndodh me mua që kam mundësinë të flas edhe me median. Kam fatin të ndjej mbështetjen e gjithë njerëzve tek unë, dhe siç kam fatin të ndjej edhe mosbesimin e të tjerëve”, tha Tahiri. /tesheshi.com/
