Një gjykatë në Selanik ka urdhëruar ekstradimin në Shtetet e Bashkuara të një shtetasi rus, që akuzohet për pastrim parash.
38-vjeçari Aleksandër Vinik akuzohet nga autoritetet amerikane për pastrimin e 4 miliardë dollarëve përmes platformës elektronike Bitcoin.
Sipas akuzës, nëpërmjet kësaj platforme ai legalizonte fitimet e paligjshme të grupeve të ndryshme kriminale.
Proçesi në Selanik, që kishte filluar javën e kaluar, përfundoi të mërkurën, me shpalljen e vendimit.
Gjykata ka vendosur që t’u dorëzojë autoriteteve amerikane edhe kompjuterat, tabletat dhe telefonat celularë që iu gjetën Vinikut në momentin e arrestimin.
Aleksandër Vinik u arrestua në bazë të një urdhër arresti ndërkombëtar. Atij iu hodhën prangat në muajin korrik në një hotel të zonës turistike Halkidiki.
Para trupit gjykues Vinik i mohoi akuzat dhe kërkoi që mos të ekstradohej. /tesheshi.com/
