Gjykata Europiane e Drejtësisë ka shpallur sot se vendet e BE-së nuk mund t’i burgosin emigrantët dhe refugjatët pa dokumente për hyrje në vendet e zonës Shengen.
Gjykata kryesore e bllokut europian ka deklaruar se rregullat e BE-së e pengojnë burgosjen e refugjatëve dhe emigrantëve që kanë kapërcyer një kufi nëse nuk u janë nënshtruar tashmë procedurave të deportimit.
Vendimi u bë i njohur pas shqyrtimit të rastit të ganezes Selina Affum, e kapur nga policia franceze në 2013-n në Kanalin e Tunelit, duke udhëtuar në një autobus nga Belgjika drejt Mbretërisë së Bashkuar.
Ajo do të paraqiste një pasaportë belge, me tjetër emër e fotografi, për çka policia franceze e ndaloi për hyrje ilegale në vend.
Affum e kundërshtoi arrestimin, dhe një gjykatë franceze i kërkoi Gjykatës Europiane të Drejtësisë të vendoste nëse ajo mund të burgosej sipas direktivave të kthimit të BE-së.
Gjykata europiane u shpreh se burgosja e saj ishte kundër “direktivës së kthimit” të BE-së, apo kundër ligjeve mbi deportimin e emigrantëve.
“Direktiva e kthimit e pengon një shtetas të një vendi jo të BE-së, që nuk i është nënshtruar akoma procedurës së kthimit, të burgoset vetëm sepse ai ose ajo ka hyrë ilegalisht në territorin e një shteti anëtar nëpërmjet një kufiri të brendshëm të zonës Shengen,“ thotë vendimi i gjykatës. /tesheshi.com/
