Një tjetër anëtar i Gjykatës së Lartë ka paraqitur dorëheqjen duke shtuar thelluar situatën e vështirë në këtë institucion.
Andi Çeliku është gjyqtari që i ka paraqitur dorëheqjen kreut të Gjykatës së Lartë, Xhezair Zaganjori, pasi i përfundoi mandati.
Në këtë mënyrë, Andi Çeliku iu bashkua dorëheqjeve të mëparshme të gjyqtarëve Aleksandër Muskaj, Evelina Qirjako dhe Arjana Fullani.
Aktualisht kjo gjykatë ka vetëm 10 anëtarë nga 19 që duhej të kishte.
Sipas ndryshimeve të reja të Kushtetutës, anëtarët e Gjykatës së Lartë qëndrojnë në detyrë derisa zëvendësohen, por 4 anëtarët në fjalë nuk kanë pritur.
NJOFTIMI:
Në zbatim të detyrimeve kushtetuese, Kryetari i Gjykatës së Lartë, me datë 29.06.2017, thirri mbledhjen e trupës së gjyqtarëve të Gjykatës së Lartë, në të cilën kërkoi deklarimin e mbarimit të mandatit të gjyqtarëve Aleksandër Muskaj, Evelina Qirjako, Guxim Zenelaj, Arjana Fullani dhe Andi Çeliku.
Kryetari i Gjykatës së Lartë, me shkresën nr. 2859 datë 30.06.2017, ka njoftuar Presidentin e Republikës, në cilësinë e Kryetarit të Këshillit të Lartë të Drejtësisë, për vendimmarrjen e trupës gjyqësore të Gjykatës së Lartë lidhur me mbarimin e mandatit të këtyre gjyqtarëve, duke theksuar se, sipas ndryshimeve të reja kushtetuese, dhe konkretisht pikës 5 të nenit 136 të Kushtetutës, gjyqtari i Gjykatës së Lartë qëndron në detyrë deri në emërimin e pasardhësit.
Ndërkohë, katër prej gjyqtarëve të sipërpërmendur i kanë paraqitur Kryetarit të Gjykatës së Lartë, përkatësisht në datat 28.07.2017 dhe 31.07.2017, në mënyrë individuale, një shkresë më anë të së cilës njoftojnë dorëzimin e detyrës si anëtarë të Gjykatës së Lartë për shkak të mbarimit të mandatit.
Sot më datë 06.10.2017, me të njëjtat argumenta Z. Andi Çeliku i paraqiti Kryetarit të Gjykatës së Lartë shkresën më anë të së cilës njofton dorëzimin e detyrës si anëtar i Gjykatës së Lartë.
Lidhur me dorëzimin e detyrës nga ky gjyqtar, Kryetari i Gjykatës së Lartë, po sot, njoftoi edhe Presidentin e Republikës. /tesheshi.com/
