Në prag të përvjetorit të Srebrenicës, krimit gjenocidal serb mbi muslimanët e Bosnjes, Gjykata e Lartë në Beograd ka liruar një ish-gjeneral që i ka duart me gjak nga ajo kasaphanë më sfond entiko-fetar.
Fjala është për ish-komandantin e Korpusit të Drinës të Ushtrisë së Repubika Srpska, Milenko Zhivanoviç, i liruar nga akuzat për krime lufte kundër popullsisë civile në Srebrenicë, në korrik 1995.
Vendimi i shkallës së parë e liroi Zhivanoviçin nga akuzat se ai urdhëroi zhvendosjen me forcë të popullsisë boshnjake nga zona e sigurt e Srebrenicës, raporton Al Jazeera.
Në shpjegimin e vendimit, gjyqtari deklaroi se Zhivanoviç, si komandant, i dha detyra Korpusit të Drinës, por se asnjë nga këto detyra nuk kishte për qëllim zhvendosjen me forcë të civilëve boshnjakë, por misionet luftarake kundër njësive të palës kundërshtare në konfliktin e armatosur.
Me rënien e Srebrenicës, një qytet në lindjen e largët të Bosnjës dhe Hercegovinës, formacionet ushtarake, policore dhe paraushtarake serbe nga Republika Srpska dhe Serbia fqinje kryen gjenocid kundër banorëve të asaj “zone të sigurt të OKB-së”. Pasi pushtuan qytetin dhe rrethinat e tij, më 11 korrik 1995, ata vranë të paktën 8,372 njerëz.
Dhe ky është gjenerali që mburrej se si ushtria e tij kishte shembur xhamitë dhe minaret në Luginën e Drinës…
