Siç duket presioni i opinionit publik pati efektin e vet. Zyra për informim e Gjykatës së Apelit ka njoftuar përmes një komunikate për media se ia ka ndërprerë sot masën e paraburgimit të pandehurit A.M. Ky i fundit, ditë me parë ishte shpallur fajtor nga ana e Gjykatës Themelore në Prishtinë, për shkak të veprës penale të kanosjes, parashikuar sipas nenit 185 të Kodit Penal të Republikës se Kosovës, dhe ishte dënuar me tre muaj burgim. E njëjta gjykatë po ashtu, ndaj tij kishte caktuar masën e paraburgimit, deri sa aktgjykimi të bëhet i plotfuqishëm.
“Sipas vlerësimit të kolegjit penal të Apelit, nuk ka arsye ligjore për caktimin e paraburgimit konform nenit 187 par.1 nënpar1.1 e 1.2 pika 1.2.3 të Kodit të Procedurës Penale, ngase nuk ekziston rreziku i përsëritje së veprave penale. Kjo kur kihet parasysh fakti se gjykimi është mbajtur, dënimi iu ka shqiptuar dhe në seancën e shqyrtimit fillestarë, i pandehuri i ka pranuar veprat penale, është penduar për to, si dhe të dëmtuarve ( Arban Abrashi dhe B.M.), u ka kërkuar falje publike”, thuhet ndër të tjera në njoftim.
Gjykata e Apelit konstaton se nuk ka rrethana të posaçme që arsyetojnë frikën e bazuar, se me ndodhjen e tij në liri, do të mund të përsëriste veprat penale, ndaj vlerëson se masa e paraburgimit kundër të pandehurit është e pajustifikueshme.
Rasti i dënimit të A.M, ka nxitur reagime të shumta për sa i përket kohës së shpejtë që është gjykuar, pasi që dihet se ka raste të tilla që me vite presin për t’u shqyrtuar. Gjithashtu janë tërhequr paralele ndërmjet kërcënimeve të ngjashme që i janë bërë personave tjerë, përfshirë këtu edhe personave publik, dhe nuk është marrë një vendim i tillë aq i shpejtë. /tesheshi.com/
