Gjykata e Apelit bën të ditur se Oliver Ivanoviq nuk duhej lënë me arrest shtëpiak pasi vepra për të cilën ai akuzohet parasheh paraburgim.
Një kolegj i përbërë prej dy gjyqtarësh ndërkombëtarë dhe një gjyqtari vendor, ka miratuar aktvendimin në rastin e të pandehurit Oliver Ivanoviq.
“Në aktvendimin e saj të datës 27 janar 2016, Gjykata e Apelit ka konstatuar se masa në fjalë e arrestit shtëpiak është caktuar gabimisht. Sipas interpretimit të saktë të nenit 367, par. 2 të KPP-së, masa e paraburgimit është e detyrueshme sa herë që i pandehuri dënohet me më shumë sesa pesë vjet burgim. Nuk ka diskrecion këtë drejtim, prandaj Gjykata e Apelit e ka ndryshuar aktvendimin e Gjykatës Themelore ashtu që masën e arrestit shtëpiak ndaj të pandehurit Oliver Ivanoviq e ka zëvendësuar me masën e paraburgimit, derisa aktgjykimi në fjalë të marrë formë të prerë”, thuhet në komunikatën e Apelit.
Më 21 janar Gjykata Themelore e Mitrovicës e ka dënuar të pandehurin Ivanoviq me nëntë vjet burgim për kryerjen e veprës penale ‘krime lufte kundër popullsisë civile’.
/tesheshi.com/
