Ndërsa Kuvendi i Kosovës ditë më parë miratoi një rezolutë përmes së cilës kërkohet lirimi i Ramush Haradinajt që po mbahet peng në Francë pas një fletë-arresti serb, me duar në xhepa nuk po rri as Serbia që po bën të pamundur të ndikojë që të zgjatet procesi.
Zyrtari serb, Marko Gjuriq, në një deklaratë për media ka thënë se dëshmitë që Serbia i ka dërguar në gjykatën e Kolmarit për rastin Haradianj janë “jashtëzakonisht serioze” dhe se nuk ka asnjë arsye që Franca të mos veprojë në pajtim me obligimet ndërkombëtare.
“Po e monitorojmë me kujdes se si Franca po merret me këtë rast dhe e përsëris – sido që ata të veprojnë ndaj kërkesës sonë, ashtu do të veprojmë edhe ne në kërkesat e tyre”, ka deklaruar Gjuriq në TV “Pink” të Serbisë.
Ai thotë të jetë shumë i kënaqur që gjyqësia serbe dhe organet tjera shtetërore kanë punuar në atë drejtim që njerëz si Haradinaj të dalin para drejtësisë, pavarësisht vendimit të Hagës.
“Për këtë arsye ne kemi kërkuar përmes Interpolit arrestimin e Haradinajt dhe shumë të dyshuarve tjerë për krimet më të rënda të luftës. Besoj se drejtësia është e nevojshme në mënyrë që të hapet një faqe e re në historinë e marrëdhënieve shqiptaro-serbe. Dënimi i krimeve të luftës plotëson drejtësinë dhe viktimat dhe kontribuon që situata politike në krahinën jugore të Serbisë të “pastrohet” sepse nuk është mirë që akterët kryesorë në jetën politike të jenë ata për të cilët dihet se janë bartës të vrasjeve dhe konflikteve”, ka deklaruar Gjuriq.
Kujtojmë se gjykata në Kolmar vendimin përfundimtar për Haradinajn pritet ta marrë më 6 prill. /tesheshi.com/
