Drejtori i Zyrës së Kosovës në qeverinë serbe ka arritur të futet në territorin kosovar edhe pse është ndaluar nga qeveria e Prishtinës ta bënte këtë.
Siç bën të ditur agjencia e lajmeve Tanjug, Gjuriq doli për pagazetarët nga qyteti i Leposaviqit në Kosovën e veriut dhe tha se po bëntë punën e tij të zakonshme.
“Nuk e di kush ka folur për ndalimin tim në Kosovë, por unë po bëj punën për të cilën jam ngarkuar. Është në interesin tonë që të krijojmë kushte normale për njerëzit”, tha Gjuriq.
Gjuriq nuk është i vetmi zyrtar serb që ditët e fundit u tha se i është ndaluar hyrja në Kosovë. E njëjta gjë ndodhi edhe me Vojisllav Sheshelin.
Ditën e sotme, ministri në detyrë i Punëve të Jashtme të Kosovës, Petrit Selimi mori vendim për t’ia ndaluar për një kohë të pacaktuar hyrjen në Kosovë Marko Gjuriqit.
Selimi tha se këtë vendim e ka marrë pasi zyrtari serb është futur të premten në territorin e Kosovës në mënyrë ilegale, pasi nuk i ishte dhënë leja nga autoritetet e Prishtinës.
Ai tha se Gjuriq kishte kërkuar leje për hyrje në Kosovë vetëm disa orë para planifikimit të vizitës, që bie në kundërshtim me marrëveshjen e Brukselit, e cila specifikon se serbët duhet të kërkojnë leje në Prishtinë së paku 24 orë para vizitës.
Qeveria e Kosovës ka marrë edhe një tjetër vendim, që nga e hëna jua ndalon serbëve të Kosovës përdorimin e letërnjoftimeve, të cilat ua kishin lëshuar strukturat paralele në Kosovë.
/tesheshi.com/
