Ish-oficeri i policisë së Minneapolis Derek Chauvin pranoi të mërkurën në gjykatën federale në Minesota se ai kishte shkelur të drejtat civile të afrikano-amerikanit George Floyd në një arrestim që përfundoi me vdekjen e tij, duke ndryshuar deklaratën e tij të shtatorit kur tha se nuk ndihej fajtor për aktakuzën.
Chauvin, 45 vjecc, përballet me dënimin maksimal me burgim të përjetshëm, edhe pse prokurorët mund të kërkojnë një dënim më të butë sepse ai e pranoi fajin.
Chauvin tashmë është dënuar në gjykatën shtetërore me 22 vjet e gjysmë burg për vrasjen e Floyd në 2020.
Floyd vdiq gjatë arrestimit sepse Chauvin u gjunjëzua në qafën e tij për nëntë minuta, gjë që u regjistrua nga një kalimtar i rastit në telefonin e tij celular.
Kjo tronditi të gjithë botën dhe ndezi një nga protestat më të mëdha në SHBA në dekada.
Chauvin dhe tre oficerë të tjerë policie, Thomas Lane, J. Alexander Kueng dhe Tou Thao, arrestuan Floyd me dyshimin se kishte përdorur një kartëmonedhë të falsifikuar prej 20 dollarësh.
Lane, Kueng dhe Thao akuzohen në gjykatën shtetërore për ndihmë në vrasjen e tij dhe gjyqi i tyre do të fillojë në mars.
Përveç nivelit shtetëror, të katër akuzohen në nivel federal se i mohuan Floyd të drejtat e tij civile sepse nuk i dhanë ndihmë mjekësore.
Chauvin akuzohet gjithashtu në nivel federal për shkelje të së drejtës së Floyd për të mos u arrestuar në mënyrë të pajustifikueshme duke përdorur forcë të tepruar. Thao dhe Kueng akuzohen në nivel federal se kanë shkelur të drejtën e Floyd për të mos u arrestuar në mënyrë të pajustifikueshme duke dështuar për të ndërhyrë dhe për të hequr Chauvin ndërsa është gjunjëzuar në qafë. /tesheshi.com/
