Podgorica i tregon derën Moskës duke ndaluar të vizitojë vendin një prej eksponentëve më të fuqishëm të Rusisë.
Njeriu i aferës së armëve në Serbi, zv.kryeministri rus Dmitry Rogozin, është ftuar nga opozita malazeze “Fronti Demokratik” për të vizituar vendin, por nuk është lejuar nga qeveria.
Këtë e ka bërë të ditur Ministria e Jashtme e Podgoricës, e cila theksoi në një deklaratë se Rogozin është në listën e zezë të Bashkimit Europian dhe nuk lejohet të vizitojë vendet anëtare dhe kandidate të BE-së.
Ndërkaq, Ministria e Jashtme thekson se Rogozin ishte ftuar të vizitojë Malin e Zi nga ana e kreut të opozitës, Milan Knezeviç, pa u konsultuar me organet kompetente malazeze.
Siç bën të ditur agjencia e lajmeve Beta, Mali i Zi ka vendosur zbatimin e sanksioneve që Bashkimi Europian i ka vendosur Rusisë pas ndërhyrjes në Ukrainë.
Rogozin edhe në të kaluarën ka lëshuar deklarata kërcënuese drejt Malit të Zi pas orientimit të tij për t’u anëtarësuar në NATO. /tesheshi.com/
