Kryeministri malazez, Milo Gjukanoviç, ka deklaruar se Rusia nuk e përkrah hyrjen e vendit të tij në NATO, ndaj i mbështet protestat e një pjese të opozitës malazeze.
Në një intervistë televizive, njeriu i fortë i Podgoricës deklaroi se qarqe nacionaliste në Beograd, Kisha Ortodokse Serbe dhe Moska, janë kundër kursit perëndimor të Malit të Zi.
“Kjo është një politikë strategjike e Moskës, që të mos lejojë zgjerimin e Aleancës së Atlantikut të Veriut në Ballkan,” tha Gjukanoviç. Sipas kryeministrit malazez, kjo është edhe arsyeja se përse Rusia i mbështet protestat në Podgoricë.
“Ne shohim sot që organizatorët e protestave janë të mbështetur fuqishëm prej nacionalistëve nga Beogradi. Ndryshimi, i cili duhet të theksohet dhe që nuk është i vogël, është fakti se në këto momente Beogradi zyrtar nuk mbështet protesta dhe sulme mbi sovranitetin e Malit të Zi. Gjithsesi, nacionalistët serbë, të lidhur rreth strukturave të caktuara politike dhe strukturave sociale të fuqishme, siç është Kisha Ortodokse e Serbisë, që kanë qenë kundër pavarësisë së Malit të Zi, janë sot po aq të fuqishëm. Ata hapur i mbështesin protestat në Mal të Zi, dhe janë në pritje të dorëheqjes së qeverisë, për ta vënë në pikëpyetje statusin e shtetit të pavarur të Malit të Zi, e nëse është e mundur, për ta bërë Malin e Zi një sferë interesi dhe influence të kontrolluar prej tyre.
“Duke parë dy deklaratat e lëshuara nga Ministria e Jashtme e Rusisë, ku thuhet se, ‘politika ruse është në mbështetje të organizatorëve të protestave’, mendoj se nuk ka asnjë dyshim që objektivat e tyre politikë janë të njëjtë: ndalimi i anëtarësimit të Malit të Zi në NATO. Ndalimi i zgjerimit të NATO-s në Ballkan është një objektiv zyrtar i politikës shtetërore ruse, dhe kjo gjë na çon në përfundimin se organizatorët e protestave në Mal të Zi kanë mbështetje të fortë nga disa qarqe të caktuara politike, ekonomike dhe sigurie jashtë vendit,” ka deklaruar kryeministri malazez, Milo Gjukanoviç. /tesheshi.com/
