Shqiptarët e Malit të Zi e kanë kërkuar prej vitesh shpalljen e Tuzit komunë, e cila është nën hijen e bashkisë së madhe të Podgoricës dhe pushteti malazez nuk e lëshonte.
Por tashmë, duke e parë veten të kërcënuar nga më shumë se 40 përqind e pjesës serbe të Malit të Zi që është e lindur fund e krye me Moskën, kreu i partisë në pushtet, Milo Gjukanoviç ka vendosur të marrë vendime konkrete pro shqiptarëve.
Nazif Cungu, kryetari i partisë “Forca” dhe njëkohësisht kreu i Komunës së Ulqinit, sapo njofton në faqen e tij se kanë firmosur paktin që e kthen Tuzin në një komunë reale, e që pritet të udhëhiqet nga shqiptarët.
“Të dashur miq sot qeveria kaloi ligjin për Organizimin Territorial i cili formon Komunën e shumëpritur të Tuzit. Në këtë mënyrë ne po ia dalim që të përmbushim një ndër kërkesat kryesore të shqiptarëve të Malit të Zi duke realizuar gjithashtu një premtim të kamotshëm të Forcës së Re Demokratike. Unë ju falënderoj për mbështetjen e vazhdueshme që na keni dhënë, fal votave tuaja ne kemi mundësuar që të vëmë në jetë aspiratën e popullit tonë për të pasur komunën e dytë me shumicë shqiptarë në Mal të Zi”, shkruan Cungu në faqen e tij. /tesheshi.com/
