Kishte vërtet nervozizëm tirada e Ramës ndaj opozitës të mërkurën në parlament, kur nisi prezantimi i projektbuxhetit 2023. Kryefjalë e saj qe etiketimi “bedel” (përfaqësues, zëvëndësues i dikujt), gjithsesi jo ndonjë fjalë e rëndë me theks pezhorativ. Mund të tungëllojë fyese vetëm varësisht kontekstit për çfarë dhe si përdoret kur artikulohet. Rama e pati kryefjalë të shfrimit të tij ndaj personazheve të opozitës, në mungesë të Berishës. Nëse do buzëqeshte ndërsa i shigjetonte, nuk do përbënte lajm gjuha e tij. Por ai nuk buzëqeshi, ndaj ngjau si hakërrim. Dhe për këtë u veçua si lajm. Më pas ndodhi që gazetarë që kurrë s’kanë guxuar ta pyesin Berishën për gjuhën e tij të rëndë ndaj kundërshtarëve, madje as t’a përmendin si njollë në karakterin e tij politik, ia morrën Ramës me të madhe, një selektivitet i njohur ky, ku kokëulur ndaj Berishës, bëjnë kurajozin me Ramën.
Këtyre u duhet kujtuar se bash për llojin e gjuhës së tij, Rama u shfaq si fenomen kulturor në ‘90-ën, ku prodhonte parreshtur batuta plot art e cinizëm bashkë kundër regjimit. Dhe, edhe pse nuk ishin kanalet sotme të komunikimit, me kryesore rrjetet sociale, ajo çfarë Rama prodhonte me verbin e tij unikal, shkonte fuqishëm e zinte vend në popull. Bash kjo i dha aq shumë pushtet publik asokohe e më vonë, derisa me atë lloj profili, si piktor i fjalës, asaj që godet në asht, duke zotëruar njëherësh një ligjërim të konkurrueshëm edhe me tis politik, iu fut politikës.
Për këtë, ai ka një referencë: Nolin. Pretendon se gjuha e tij është e llojit nolist, diçka që vërtet Noli e ka patur, figuracionin e pasur letrar dhe ironinë e thellë.
Çështja është: Berisha kë ka referencë? Ose ose PD, gjuha kolektive e së cilës është ajo e Berishës. Pra, për gjuhën e saj të neveritshme akuzatore, kurrë me ndonjë art letrar sa për ta zbutur, madje krejt banale, PD kë merr si model?
Le ta pranojmë: gjuha e Ramës, gjithsesi ka teprimet e veta, edhe prej tensionit politik apo lodhjes së nervave, por çështja është se ankimtarja ndaj saj, PD, është ndotësja historike e ligjërimit politik në 30 vjet. Madje ndër degradimet e saj është pikërisht gjuha. Prej saj, PD e ka humbur të drejtën të ankohet apo të bëjë viktimën. Prej saj dhe ka humbur elektorat qytetar, por s’do ta kuptojë e s’do ta pranojë.
Ngjan kjo me rastin e reagimit të Palokës ndaj Ramës, duke ia bojatisur fytyrën pas një bullizimi që i bëri kryeministri në publik, thuthuqllëkut të tij por jo për faj të tij. Dhe për këtë e kishte hak atë që i bëri Paloka. Është vërtet e rëndë të bullizosh kundërshtarin në tipare fizike, pas së cilave është vetë Zoti si Krijues. Por për hir të drejtësisë në gjykim, i takon dhe Saje Qorrit(Saimir Tahirit) që të bëjë të njëjtën gjë si Paloka me Berishën & Co. /tesheshi.com/
