Kryeministri i ri francez Jean Castex ka parashtruar pikëpamje të ashpra për çështje të identitetit kombëtar francez dhe respektimin e ligjit.
Duke paraqitur detajet e politikave të tij për dy vitet e fundit të mandatit të presidentit centrist, Emmanuel Macron, kryeministri i sapoemëruar premtoi se do të ishte “pa kompromis” në mbrojtjen e sekularizmit zyrtar francez.
“Republika nënkupton sekularizmin si vlerë kryesore, pararendësin e kohezionit kombëtar,” i tha Castex Asamblesë Kombëtare dhe u zotua të luftojë “islamizmin radikal në të gjitha format e tij”.
Duke iu drejtuar parlamentarëve, ai njoftoi se një ligj i ri për të luftuar “separatizmin” do të miratohej pas verës.
Republika Franceze është “tronditur në themelet e saj nga koalicionet e armiqve të saj – terroristët, teoricienët e komplotit, separatistët dhe antiberalistët”, paralajmëroi ai.
Dhe Macron, kohët e fundit, pas protestave kundër dhunës së pretenduar të policisë dhe racizmit në Paris, paralajmëroi se lëvizjet antiraciste ishin marrë nga “separatistët”, por nuk tha se çfarë nënkuptonte me atë term.
Disa anëtarë të pakicës muslimane franceze besojnë se sekularizmi zyrtar francez përdoret më së shumti kundër tyre, por vetë Macron ka dënuar qasjen e pabarabartë ndaj sekularizmit.
Castex njoftoi një qëndrim të rreptë mbi dhunën në protesta dhe krimin e vogël, duke thënë se policia do të marrë fondet e nevojshme.
Kryeministri i ri është zotuar të rihapë negociatat për planin e Macron për të zëvendësuar më shumë skema pensionesh franceze me një sistem të vetëm kombëtar.
Castex tha që ai po merrte detyrën në një “moment shumë të veçantë” në historinë franceze, pasi epidemia e COVID-19 në vend “shkaktoi një nga krizat më të mëdha me të cilat përballet Franca.
Ai tha se do të takohet me sindikatat dhe punëdhënësit të premten për të rënë dakord se si t’i qasemi “të gjitha çështjeve që janë në tryezë për javët dhe muajt e ardhshëm, duke filluar me planin për të rifilluar ekonominë”. /tesheshi.com/
