Nga Blendi Gashi
Zv.kryeministrit, njëherit ministrit të Drejtësisë, Dardan Gashi gjuajtja me armë nga oda e shtëpisë së zv.kryeministrit tjetër Fatmir Limaj në festën e organizuar pas lirimit të këtij të fundit nga akuzat për korrupsion në rastin e Ministrisë së Transportit, mund t’i kushtojë me shkarkim.
Është LDK-ja e Isa Mustafës që ka dorëzuar në Kuvend kërkesën për interpelancë për kryeministrin Haradinaj në lidhje me rastin në fjalë.
Avdullah Hoti, kryetar i grupit parlamentar të LDK-së ditë më parë tha se ata do të kërkojnë që Kuvendi të votojë për shkarkimin e Gashit.
“Ne kemi analizuar me kujdes sjelljen e tij dhe ajo sjellje bie ndesh me Kodin penal të Kosovës për armëmbajtje pa leje. Me këtë është dëmtuar imazhi i qeverisë së Kosovës para qytetarëve dhe partnerëve tanë ndërkombëtarë. Prandaj, ne kërkojmë këtë interpelancë me kryeministrin për të diskutuar në detaje se si mundet një zyrtar i lartë të sillet kështu”, tha Hoti.
Se sjellja e Gashit nuk justifikohet e ka thënë edhe minsitri i Drejtësisë, Abelard Tahiri, i cili në një intervistë dhënë për televizionin “Dukagjini”.
“Kjo nuk i bën nderë qeverisë së Kosovës. Ai është një shembull shumë i keq. Një zëvendësministër i Kosovës të shihet në pamje të tilla është mjaft e pahijshme dhe nuk mund të arsyetohet në asnjë rrethanë një pamje e tillë”, tha Tahiri.
Ndërkohë policia ka dorëzuar në Prokurori kallëzimin penal ndaj zv.kryeminsitrit Gashi, dhe të tjerëve (Sami Lushtakut e Endrit Shalës), për gjuajtje me armë zjarri në ambient të mbyllur.
Ja pse Gashi i duhet ende Haradinajt…
Duke parë këto kritika e në veçanti kërkesën e LDK-së për shkarkim, shtrohet pyetja se a do merr Haradinaj vendim për ta shkarkuar Gashin?
Sigurisht se një vendim të tillë nuk e ka fare lehtë ta ndërmerrë për faktin se pikërisht Gashi e ndihmoi jo pak Haradinajn të vije në krye të qeverisë duke ja siguruar mbështetjen e deputetes së LDK-së Teuta Rugova edhe pse kjo e fundit nuk ishte në seancë kur u votua qeveria “Haradinaj”, përkrahje e cila i duhet në vijimësi Ramushit pasi një vote mund ta rrëzojë nga pushteti.
I vetëdijshëm se Daradani mund t’i kryejë punën ende dhe është një prej faktorëve që mund ta mbajë në këmbë qeverinë, Haradinaj do ta ketë vështirë ta shkarkoi pasi vota e bijës së Rugovës mbetet e “artë” për Ramushin kur kihet parasysh paralajmërimi i LDK-së se do të ngrit mocion mosbesimi ndaj qeverisë së tij .
Kujtojmë se në videon e publikuar nga KTV-ja shihen teksa gjuajnë me armë nga dritarja e shtëpisë së Limajt, ish-kryetari i Skenderajt, Sami Lushtaku, zv. kryeministri Dardan Gashi, si dhe këshilltari i Limajt, Endrit Shala. Por që nuk janë të vetmit, pasi në video vërehen edhe të tjerë persona, të cilët gjuajnë me armë zjarri. /tesheshi.com/
