Nga Bashkim Kastrati
Aksidentet e shumta gjatë muajve të fundit kanë ndikuar që të rritët vlera monetare e gjobave për shkelësit e rregullave të komunikacionit. Me ligjin e ri gjobat shkojnë deri në 900 euro.
Ligji i ri për Rregullat e Trafikut Rrugor, i cili ka hyrë në fuqi nga e marta e kësaj jave, ka paraparë gjoba mjaft të larta për shoferët që bëjnë shkelje në komunikacion.
Ky ligji i cili është proklamuar nga Ministria e Infrastrukturës (MI), ka si qëllim kryesor që të rrisë sigurinë në trafik. Por sipas ekspertëve të komunikacionit, ky ligji do të sjellë vetëm konflikte në rrugë, ikje nga proceset gjyqësore. Prandaj, ky ligj duhet urgjentisht të kthehet në qeveri në mënyrë që të punojë grupi i ekspertëve jashtë institucioneve shtetërore duke respektuar standardet evropiane, pasi që si i tillë është i papërballueshëm për qytetarët duke marrë parasysh situatën ekonomike në Kosovë.
Sipas ligjit të ri, për munges patente, gjoba shkon nga 200 deri në 1500 euro. Gjithashtu, edhe nëse brenda zonës urbane lëviz me mjet me shpejtësi mbi pesëdhjetë (50) km/h mbi shpejtësinë e lejuar, të përcaktuar me rregulla të përgjithshme, atëherë gjoba shkon nga 300 deri në 900 euro, ku përveç gjobës atij i shqiptohet masa mbrojtëse “Ndalim i të drejtuarit të mjetit me veprim motorik” në kohëzgjatje prej së paku një viti, si dhe i shqiptohen pesë pikë negative. Ndërkaq, për këmbësorët që kalojnë rrugën jashtë vendkalimeve ku nuk është e dedikuar për këmbësorë, dënimi do të jetë 20 euro.
Lehtësia e kësaj ashpërsie konsiston vetëm në faktin se gjobëmarrësi paguan vetëm 50% të shumës nëse shkon për ta paguar brenda tetë (8) ditesh që nga data e marrjes së saj.
Qytetarët janë shprehur të pakënaqur me këtë ligj që sipas tyre është jashtë realitetit dhe standardin jetësor që ka Kosova. Ata thonë se duke marrë parasysh se një pjesë i takojnë shtresës së ulët, do të ketë pakënaqësi të mëdha ndaj policisë së trafikut. Por ka edhe nga ata qytetarë që e përkrahin këtë masë juridike, duke thënë se kjo është një mënyrë që të ndalen aksidentet e shumta të komunikacionit që po ndodhin në Kosovë.
Policia e Kosovës zakonisht shqipton qindra gjoba për kundërvajtje, sipas raporteve zyrtare për 24-orët e fundit, gjobat e shqiptuara brenda 24 orëve zakonisht janë 700 deri në 1000.
Bajram Kelmendi, shofer me përvojë shumëvjeçare thotë se rritja e gjobave është e dëmshme për qytetarët pasi që gjobat janë normale që të shqiptohen në secilin vend, duke qenë së është e pamundur që të mos-shkelen nganjëherë rregullat e komunikacionit.
“Po dëgjova për këtë ligj dhe mund të them se është jo i përshtatshëm për Kosovën pasi që gjobat janë shumë të larta për standardin tonë. Është e pamundur që secili shofer të mos shkelë këto rregulla qoftë edhe ndonjë shkelje e lehtë, si p.sh rripi i sigurisë, apo për 5-10 kilometra e tejkalon shpejtësinë e lejuar. Gjobat duhet të lihen siç kanë qenë se edhe ashtu kanë qenë të larta”, thotë ai.
Ndërsa Enver Halili thotë se nuk është zgjidhje që gjobat të rriten, pasi që nuk e zgjidh kjo problemin e aksidenteve. Ai thotë se problemi i aksidenteve zgjidhet duke rregulluar shenjat në rrugë, pasi që ka vende të rrezikshme ku nuk ka shenja paralajmëruese, gjithashtu ka edhe rrugë të papërshtatshme, rrugë të ngushta që shpesh janë shkaktare të aksidenteve.
“Kjo nuk është zgjidhje, nëse duan që ta mbushin buxhetin e shtetit lë të tregojnë, por jo në këtë mënyrë pasi që një gjobë më e lartë nuk e zgjidh problemin e aksidenteve. Duhet së pasi të ketë prani më të madhe të policisë në trafik edhe në rrugë jashtë qyteteve, duhet që të jenë të vendosur nëpër pika të ndryshme, por edhe të lëvizin. A e keni parë kur është një veturë e policisë duke lëvizë nëpër rrugë të gjithë pas saj e respektojnë rregullën e shpejtësisë. Gjithashtu duhet të rregullohen disa rrugë, të vendosen shenjat paralajmëruese pasi që kemi pasur raste kur shoferë që nuk janë të Kosovës gjatë natës kanë hyrë direkt në rreth pasi që nuk kanë qenë shenjat e vendosura”, thotë Halili.
Një pjesë e qytetarëve thonë se gjobat do t’i vendosen qytetarëve të varfër, që nuk kanë lidhje, pasi që zakonisht personat VIP, politikanët dhe zyrtarët e lartë nuk dënohen fare nga policia edhe pse bëjnë shkelje të rregullave të komunikacionit. /tesheshi.com/
