Një armëpushim i hyrë në fuqi që të hënën ka sjellë përgjithësisht qetësi në fushëbetejat në Siri, por kjo nuk ka ndihmuar aspak që te popullata të mbërrijnë ndihmat humanitare.
Nuk ka ende pajtim mes palëve për rrugën e shpërndarjes së ndihmave, raporton Al Jazeera të ketë mësuar nga burime diplomatike.
Autoritetet siriane kanë deklaruar një ditë më parë se në zonën e Halepit të kontrolluar nga kryengritësit nuk do të lejohen të hyjnë ndihma humanitare pa koordinim me qeverinë e Sirisë dhe me Kombet e Bashkuara.
Ministria e Jashtme siriane nënvizon posaçërisht se nuk do të lejohet hyrja e autokolonave turke në Siri.
Ndërkaq, kamionë me ndihma të Gjysmëhënës së Kuqe turke janë në pritje në kufi për të hyrë në Siri me flamurin e OKB-së dhe nën drejtimin e saj.
I dërguari special i OKB-së për Sirinë, Staffan de Mistura, është shprehur se shpreson që kamionët me ndihma kanë për të lëvizuar së shpejti drejt Sirisë.
Gjithnjë sipas tij, pas armëpushimit ka një qetësim të situatës në Siri. “Burimet në terren,” ka pohuar De Mistura, “edhe ato brenda qytetit të Halepit, thonë se situata është përmirësuar goxha, e nuk ka sulme ajrore.” /tesheshi.com/
