Ministri i Infrastrukturës në qeverinë e Kosovës, Pal Lekaj, i është ankuar ambasadorit Qemal Minxhozi mbi një përgjigje të munguar nga ana e homologut të tij të Tiranës, Damian Gjiknuri.
Çështja mbetet po ajo: pagesa në Rrugën e Kombit, të cilën edhe ministri kosovar e quan taksë ndonëse është tarifë.
“Në takim me Ambasadorin Qemal Minxhozi diskutuam zhvillimet e fundit në dy vendet tona, me theks të veçantë për çështjen e taksës rrugore për të cilën e rithkesova papajtueshmërinë tonë me çmimin dhe mënyrën se si është marrë ky vendim për njërën nga arteriet kryesore të lidhjes ndërshqiptare, që është “Rruga e Kombit”.
Po ashtu e diskutuam edhe letrën zyrtare me të cilën i jemi drejtuar Ministrit të Infrastrukturës dhe Energjetikës, z. Damian Gjiknuri dhe për mungesën e përgjigjes në këtë letër.
Ishte dakordim i dyanshëm që hapat e mëtutjeshëm të bëhen me dakordancë të plotë.
Shqipërisë dhe Kosovës si dy vende vëllazërore ju duhen marrëdhënie me influencë pozitive për zhvillimin e gjithëmbarshëm”, shkruan ministri Pal Lekaj në FB. /tesheshi.com/
