Në vijim të përpjekjeve qeveritare për të qetësuar nervin e protestës së banorëve të Kukësit ndaj tarifimit të Rrugës së Kombit, në qytetin verior ishte ministri i Infrastrukturës, Damian Gjiknuri.
Ai më s’pari inspektoi kantieret e punës për përfundimin e aksit Kukës-Morinë, ku janë disa ura të lënë përgjysëm, e po ashtu segmente vetëm me një kalim. Gjiknuri tha se ka aks do të përfundojë i kompletuar brenda vitit.
Dhe nga ana tjetër, tha se po negociohet për një zgjidhje lehtësuese për banorët e zonës në lidhje me tarifimin.
“Jemi duke negociuar me koncesionarin por njëkohësisht duke u konsultuar edhe me popullatën për të gjetur një zgjidhje për një tarifë të reduktuar për banorët e këtyre zonave, sidomos për transportin publik dhe qytetarët që e përdorim më shpesh rrugën Kukës-Tiranë. Nga ana tjetër, dua të them që kemi filluar edhe me evidentimin e të gjitha mjeteve që janë të targuara në Kukës.
Jemi duke bërë krahasimet me banorët që janë pjesë e këtij komuniteti dhe që i zotërojnë këto mjete, në mënyrë që të trajtohet ajo fashë e njerëzve që preken nga ky koncesion dhe që jetojnë në Qarkun e Kukësit.
Është një proces i filluar mirë dhe besoj brenda një periudhe shumë të shkurtër, përpara se të fillojë dhe njëherë funksionimi i pagesave të Toll-it, ne do të kemi një zgjidhje. Besoj do jetë shumë e pranueshme por njëkohësisht nuk cënon edhe efektivitetin e kontratës, nuk cënon mbarëvajtjen e kontratës për mirëmenaxhimin e kësaj rruge”, tha ministry Gjiknuri. /tesheshi.com/
