Gjigandi i automjeteve Volkswagen (VW) ka njoftuar se do të shkurtojë vendet e punës në fabrikën e tij të makinave elektrike në Zwickau, Gjermani, për shkak të kërkesës së dobët.
269 punëtorë do të mbeten pa punë pas skadimit të kontratës 12-mujore, njoftoi VW të enjten, më 14 shtator. Detajet do të përcaktohen në ditët në vijim në marrëveshje me këshillin e punëtorëve.
Kompania thotë se po shkurton vendet e punës për shkak të “situatës aktuale të tregut|. Kërkesa për makina elektrike mendohet të jetë e dobët për shkak të inflacionit të lartë dhe heqjes së stimujve të qeverisë. Makinat me energji elektrike janë më të shtrenjta se ato me djegie të brendshme.
Fabrika në Zwickau monton ekskluzivisht makina elektrike për VW dhe filialet e saj Audi dhe Cupra. Ajo punëson gjithsej 10,700 punëtorë, duke përfshirë 2,200 punëtorë të përkohshëm të cilët gjithashtu mund të humbasin punën e tyre.
“Volkswagen është ende 100 për qind i bindur se duhet të vazhdojë në rrugën drejt lëvizshmërisë elektrike”, theksoi zëdhënësi, duke shtuar se nuk i kanë ndryshuar planet e tyre. E ardhmja e Fabrikës në Zwickau është e sigurt, shtoi ai, duke paralajmëruar investime të reja.
Fabrika ishte e para në VW që filloi të prodhonte automjete elektrike, modele VW ID.3, ID.4 dhe ID.5, Q4 e-tron të Audi-t dhe Q4 Sportback dhe Cuprin Born. Prodhimi i makinave me motorë me djegie të brendshme u ndërpre në vitin 2020.
Pavarësisht kapacitetit rezervë në uzinën e Zwickau, kompania planifikon të prodhojë Q4 e-tron dhe VW ID.3 edhe në fabrika të tjera.
“Nga fundi i vitit 2023, ne do të prodhojmë Q4 e-tron si në Bruksel ashtu edhe në Zwickau”, tha zëdhënësja e Audi-t. /tesheshi.com/
