Programet elektorale shpesh nuk i lexon askush. Kështu, Podemos, partia e lindur në Spanjë nga ish-të indinjuarit kundër sistemit, ka vendosur ta publikojë përmbledhjen e premtimeve të veta në një formë të pazakontë: në një katalog si të Ikeas, gjigantit të tregtimit të mobilieve. Katalogu është i ngjashëm me ato që qendrat tregtare publikojnë për të reklamuar produktet e tyre. Modeli mbi të cilin është punuar publikimi prej 192 faqesh duket qartë se është kopjuar nga një katalog i kompanisë së madhe të mobilieve.
Metafora që kanë dashur të përcjellin ata të Podemos, një brez i ri politikanësh që nuk kanë lidhje me traditën, është i qartë: shtëpia, si vendi që do të thotë ilustrimi i premtimeve për vendin me ato që duhen rregulluar në një shtëpi.
Grafikët janë identikë, por vendin e mobiljeve dhe aksesorët janë zëvendësuar me masat që Podemos propozon për të fituar zgjedhjet e 26 gushtit dhe për të qeverisur vendin.
Njerëzit që pozojnë për të ilustruar publikimin janë kandidatët e Podemos, duke nisur nga kryetari Pablo Iglesias. “Do të jetë programi më i lexuar i të gjitha kohërave”, thotë Carolina Bescansa, numri tre i partisë. Ideja është e aq e sofistikuar saqë edicioni i printuar i katalogut është në shitje për një çmim prej 1.80 eurosh, ndërsa version dixhital është falas.
Podemos arrin në këto zgjedhje me besimin e fortë për të lënë pas rivalët socialistë. Tejkalimi i tyre, në votë absolute dhe ndoshta edhe në vendet e fituara në parlament, parashikohet në të gjitha sondazhet që qarkullojnë në këto ditë. E reja e madhe është se partia e Pablo Iglesias paraqitet si aleate me “Izquierda Unida”, koalicionin e së majtës radikale, që rimishëron identitetin komunist.
Programi përmbledhës i kësaj aleance parashikon rritje të dukshme të shpenzimeve publike, pavarësisht kërkesës për të kundërtën nga Komisioni Europian për Spanjën.
Për të riballancuar dhjetë miliardë euro që do të shpenzoheshin, Podemos parashikon një rritje të taksave për të ardhurat e larta. “Por, në Europë do të shkojmë të negociojmë në krah të Greqisë dhe Italisë kundër masave të kursimit që janë imponuar gjatë këtyre viteve”, shpjegon Pablo Iglesias.
Përgatiti: Juli Prifti – /tesheshi.com/
