Nga ata që kontrabandohen në Gjermani, pothuajse 42 për qind vijnë nga Polonia, 29 për qind nga Austria dhe 22 për qind nga Republika Çeke.
Migrimi i paligjshëm drejt Evropës u rrit ndjeshëm vitin e kaluar dhe Gjermania mbeti destinacioni kryesor, njoftoi Zyra Federale e Policisë Kriminale, transmeton Anadolu.
Sipas të dhënave të fundit zyrtare, numri i kalimeve të paligjshme përtej kufijve të jashtëm të Bashkimit Evropian është rritur nga 326,300 në 380,200, që është numri më i lartë që nga viti 2016.
Në Gjermani, Zyra Federale e Policisë Kriminale (BKA) regjistroi 266,224 raste të hyrjes dhe qëndrimit të paligjshëm në vitin 2023, që paraqet një rritje prej më shumë se 33 për qind krahasuar me një vit më parë. Shumë nga migrantët e parregullt ishin azilkërkues nga Siria dhe Afganistani.
“Në shumë raste, këto hyrje të paligjshme në Gjermani u lehtësuan nga trafikimi i qenieve njerëzore”, thuhet në raportin e BKA.
Nga ata që kontrabandohen në Gjermani, pothuajse 42 për qind vijnë nga Polonia, 29 për qind nga Austria dhe 22 për qind nga Republika Çeke. Shumica e tyre udhëtuan në këmbë (37 përqind), furgona (26 përqind) ose vetura (24 përqind).
Qeveria e koalicionit të kancelarit gjerman Olaf Scholz ka qenë nën presionin e partive opozitare për të trajtuar migrimin e parregullt, pasi autoritetet lokale ankohen se përballen me një krizë në ofrimin e strehimit dhe mbështetjes sociale për migrantët e sapoardhur.
Partia e ekstremit të djathtë AfD, e bazuar në një platformë kundër emigracionit, ka parë një rritje të popullaritetit përpara zgjedhjeve kryesore rajonale muajin e ardhshëm në tre shtete lindore të Gjermanisë. Sipas sondazheve të fundit, AfD është në rrugën e duhur për të dalë në krye në Turingia dhe Brandenburg, ndërsa një garë e ngushtë me kristiandemokratët parashikohet në Saksoni.
