Gjermania do të rrisë numrin e trupave ushtarake

Forcat ushtarake gjermane do të kenë një rritje të ndjeshme të trupave në shtatë vitet e ardhshme. Njoftimi vjen vetëm një ditë pasi zëvendëspresidenti amerikan Mike Pence u kërkoi aleatëve në Europë që të shtojnë shpenzimet për mbrojtjen.

Ndërsa në majin e 2016-s qe lajmëruar rritja e parë e numrit të trupave gjermane që prej Luftës së Ftohtë, ky numër është rishikuar, me një prirje për t’u rritur.

Forvat e armatosura gjermane do të kenë një total prej 198.000 trupash në vitin 2024, me një shtim dhe të personelit civil, që atëherë do të jetë 61.000.

“Bundeswehr-i rrallë ka qenë aq i nevojshëm sa tani,” është shprehur ministrja gjermane e Mbrojtjes, Ursula von der Leyen, “në luftën kundër terrorizmit të DAESH-it, në stabilizimin e Malit, në mbështetjen e vazhdueshme të Afganistanit dhe kundër kontrabandistëve në Mesdhe dhe Egje, apo me praninë tonë të shtuar për NATO-n në Balltik.”

Ushtria gjermane ka patur një reduktim të trupave pas ribashkimit dhe përfundimit të Luftës së Ftohtë, për të njohur rritje tani, me nxitjen dhe të Uashingtonit për t’i shtuar shpenzimet e mbrojtjes. /tesheshi.com/