Liderët botërorë uruan për fitoren në zgjedhjet e parakohshme parlamentare në Gjermani liderin e opozitës konservatore, Demokristiane, Friedrich Merz, i cili është në rrugën e duhur për t’u bërë kancelar i ri, ndërsa disa prej tyre uruan edhe Alternativën për Gjermaninë (AfD) të ekstremit të djathtë, e cila është në vendin e dytë.
Koalicioni CDU/CSU, kandidati i së cilës për kancelar është Merz, është fitues i zgjedhjeve të parakohshme parlamentare në Gjermani, sipas rezultateve të para jo të plota, me gati 29 për qind të votave, përpara AfD-së me gati 20 për qind dhe socialdemokratëve në vendin e tretë me gati 16 për qind.
Presidenti amerikan Donald Trump shkroi në rrjetin social Truth Social se e diela ishte një “ditë e madhe për Gjermaninë”.
“Ashtu si në Shtetet e Bashkuara, gjermanët janë të lodhur nga politika që nuk kanë të bëjnë fare me sensin e shëndoshë, veçanërisht kur bëhet fjalë për energjinë dhe emigracionin”, shkroi Trump.
“Kjo është një ditë e mrekullueshme për Gjermaninë dhe për Shtetet e Bashkuara të Amerikës nën udhëheqjen e një zotëri të quajtur Donald J. Trump,” shtoi ai. “Urime të gjithëve – le të pasojnë më shumë fitore.”
Sekretari i Përgjithshëm i NATO-s Mark Rutte e uroi Merz për fitoren e tij, duke thënë se ai mezi priste të punonte me të, raportoi Reuters.
“Ne mezi presim të punojmë së bashku në këtë kohë vendimtare për sigurinë tonë të përbashkët. Është jetike që Evropa të rrisë shpenzimet e saj të mbrojtjes dhe udhëheqja juaj do të jetë kyçe”, tha Rutte.
Të djathtët, të kënaqur me AfD-në
Kryeministri grek Kiryakos Mitsotakis, në mesazhin e tij të urimit për Merz, deklaroi se CDU/CSU kishte arritur një “fitore të qartë”, ndërsa kryeministri çek Petr Fijala shkroi në Platformën X se i uroi Merz “shumë forcë dhe sukses në formimin e një qeverie federale”.
“Mezi pres të thellojmë më tej bashkëpunimin çeko-gjerman dhe të punojmë së bashku për të forcuar Evropën”, tha ai.
Zëvendëskryeministri italian Matteo Salvini përgëzoi AfD-në për rezultatet e zgjedhjeve. “Ndryshimi po fiton edhe në Gjermani. AfD po dyfishon votat e saj, pavarësisht sulmeve dhe gënjeshtrave nga e majta. Evropa duhet të ndryshojë rrënjësisht”, tha Salvini.
Kreu i FPO-së populiste të djathtë në Austri, Herbert Kickl, përgëzoi AfD-në për rezultatin e mirë.
Parashikimet aktuale tregojnë se AfD do të dyfishojë pjesën e saj të votave nga zgjedhjet e 2021 në pothuajse 20 për qind, rezultati i saj më i fortë ndonjëherë.
