Gjermania ka ndaluar aktivitetet e lëvizjes libaneze Hezbollah, e cila ka mbështetjen e Iranit, dhe e ka etiketuar atë si një grup terrorist, tha Ministria e Brendshme e vendit evropian.
Policia kreu bastisje herët të enjten në mëngjes për të kapur të dyshuarit se i përkisnin organizatës.
Reuters thotë se zyrtarët e sigurisë besojnë se 1,050 njerëz në Gjermani i përkasin “krahut ekstrem të Hezbollahut”.
“Ministri i Brendshëm Horst Seehofer ka ndaluar organizatën terroriste shiite Hezbollah në Gjermani. Edhe në kohë krize, sundimi i ligjit është i aftë të veprojë,” tha një zëdhënës i Ministrisë së Brendshme në Twitter.
Gjermania më parë ka ndarë seksionin politik të Hezbollahut nga njësitë e saj ushtarake që luftojnë së bashku me ushtrinë e Presidentit Bashar al-Asad në Siri, tha Reuters, duke shtuar se Izraeli dhe Shtetet e Bashkuara i kanë kërkuar prej kohësh Berlinin që të ndalojë organizimin në territorin e saj.
Dhjetorin e kaluar, parlamenti gjerman miratoi një mocion që i drejtohej qeverisë së Kancelares Angela Merkel për të ndaluar veprimet e Hezbollahut në tokën gjermane. /tesheshi.com/
