Jo vetëm shqiptarët e qytetarë të tjerë nga Ballkani, por edhe afganët të cilëve nuk u pranohet kërkesa për azil do të kthehen në vendin e tyre. Gjermani njoftoi se një numër refugjatësh afganë që nuk i përmbushin kriteret e kërkuara do të kthehen në Afganistan.
Ministri gjerman i Punëve të Brendshme do të ankohej javën e shkuar për faktin se shumë afganë kishin ardhur nga zona pak a shumë të sigurta të vendit të tyre, e këta do të ktheheshin në shtëpi. Thomas de Maiziere deklaroi se afganët që po arrinin në Gjermani përfshinin dhe një numër të shtuar të personave të shtresës së mesme, një pjesë e mirë e të cilëve prej Kabuli.
Zyrtarët gjermanë kanë bërë të qartë se azil mund t’u jepet vetëm njerëzve që kanë ikur prej luftës dhe persekutimit, e se emigrantët ekonomikë do duhet të kthehen nga kanë ardhur. Azil u është dhënë deri tani më pak se gjysmës së afganëve që kanë aplikuar në Gjermani.
Autoritetet afgane flasin për 120.000 të larguar nga vendi gjatë këtij viti. Ndërkaq, Organizata Ndërkombëtare për Migracionin jep një shifër tjetër, duke deklaruar se më tepër se 76.000 afganë kanë emigruar në 2015-ën drejt Europës. /tesheshi.com/
