Zëdhënësja e qeverisë gjermane, Ulrike Demmer tha se kthimi i shpinës ndërmjet Evropës dhe Turqisë nuk do të ishte as në interes të Gjermanisë e as të Evropës.
Duke komentuar mbi marrëdhëniet mes Bashkimit Evropian dhe Turqisë, Demmer tha në Berlin se të gjithë ata që dëshirojnë të bëhen anëtarë të Bashkimit Evropian duhet të respektojnë vlerat e saj, të cilat janë kusht për anëtarësim.
Duke vënë në dukje se në rend të ditës nuk është hapja e kapitujve të rinj në negociatat mes Brukselit dhe Ankarasë, Demmer shtoi se Turqia duhet të qartësojë fillimisht se çfarë raportesh ajo mendon të ndërtojë me Unionin.
“Përkundër të gjitha kritikave për shkak të zhvillimeve aktuale në Turqi, Komisioni Evropian ende e trajton këtë vend si kandidat për anëtarësim. Është e rëndësishme që Komisioni në të ardhmen të marrë në konsideratë në mënyrë të detajuar ekzistimin e arsyeve për pezullimin e negociatave”, ka thënë Demmer.
Të martën në Bruksel, liderët e Bashkimit Evropian do të takohet me Ministrin e Jashtëm turk, Mevlut Çavusholu dhe Ministrin për BE, Omer Çelik, ndërkohë që Demmer ka thënë se Turqia është një partner i rëndësishëm dhe se do të mbetet kështu.
“Turqia është anëtare e NATO-s. Kthimi i plotë i shpinës së Evropës ndaj Turqisë apo i Turqisë ndaj Evropës nuk do të ishte në interes të Evropës e as Gjermanisë”, përfundoi Demmer. /tesheshi.com/
