Gjermania vendosi sot t’i bashkohet fushatës ushtarake kundër ISIS-it në Irak dhe Siri, ama forcat ajrore gjermane nuk do të kryejnë misione bombarduese.
Plani qeveritar mori miratimin e parlamentit gjerman, ku nga 598 ligjvënësit që morën pjesë në votim, 445 votuan në favor të planit, 146 votuan kundër tij, e 7 të tjerë abstenuan. Parlamentarët që votuan pro pjesëmarrjes së Gjermanisë në fushatën kundër ISIS-it i përkisnin përgjithësisht bllokut kristiandemokrat të kancelares Angela Merkel dhe partnerëve të koalicionit, socialdemokratëve.
Plani parashikon që Gjermania të dislokojë gjashtë avionë luftarakë zbulues “Tornado”, një avion furnizimi dhe një anije lufte, së bashku me dislokimin e një personeli ushtarak prej 1.200 personash.
Mandati i miratuar nga parlamenti përfundon në fundin e vitit të ardhshëm, por mund të zgjatet përsëri nëse shihet e arsyeshme. Në këtë plan përfshihet dhe dërgimi i 650 trupave në Mali, për t’u ardhur në ndihmë trupave franceze që ndodhen atje.
Qeveria gjermane e justifikoi misionin ushtarak me ndikimin në vend të trazirave në Lindjen e Mesme, duke filluar nga mbërritja e mijëra refugjatëve e deri te alarmet për sulme terroriste.
Votimi dhe miratimi i planit u krye vetëm tetë ditë pasi Gjermania u zotua t’i përgjigjej kërkesës së Francës për ndihmë në luftën kundër ISIS-it pas sulmeve të 13 nëntorit në Paris. /tesheshi.com/
