Zyrtarët më të lartë të Gjermanisë kanë shprehur kënaqësinë për rezultatet e zgjedhjeve të parakohshme në Turqi, e njëkohësisht kanë treguar gatishmërinë për të vijuar bashkëpunimin në një sërë fushash, ku më e ngutshmja është kriza e refugjatëve.
Vetë kancelarja Angela Merkel do t’i telefononte kryeministrit turk për ta uruar për fitoren. Zëdhënësi i saj, Steffen Seibert, do të bënte një përshkrim të tillë, “Ne e mirëpresim faktin se zgjedhjet parlamentare në Turqi u zhvilluan në mënyrë paqësore. Ka patur një pjesëmarrje shumë të lartë të votuesve. Kjo vë në pah angazhimin e madh të popullit turk ndaj demokracisë.”
Po ashtu Seibert kujtoi se dy vendet, Gjermania dhe Turqia, do ta forcojnë bashkëpunimin pas zgjedhjeve në lidhje me krizën e refugjatëve.
Në të njëjtën linjë do të ishin dhe fjalët e zëvendëszëdhënëses së Ministrisë së Jashtme gjermane, Sawsan Chebli, që do të deklaronte, “Ne i vëmë në dukje me respekt rezultatet e zgjedhjeve. Ky respekt përfshin gjithashtu pranimin e vullnetit të elektoratit demokratik, dhe jo komentimin mbi të.”
Shqetësimeve për përqendrim të pushtetit, ajo do u përgjigjej shkurt e prerë: “Nuk e kuptoj se çfarë nënkuptoni me përqendrim të pushtetit. Elektorati ka vendosur; ata kanë vendosur t’i japin AKP-së një shumicë absolute për të formuar një qeveri me një parti të vetme, dhe ne do ta respektojmë këtë rezultat zgjedhor.”
Merkel e vizitoi Turqinë pak kohë para zgjedhjeve, dhe vizita e saj u pa nga opozita turke si një përkrahje e hapur për pushtetin aktual. Vizita e saj ishte në vazhdën e përpjekjeve të Gjermanisë për t’i dhënë një zgjidhje krizës së refugjatëve. /tesheshi.com/
