Tre pikët e para kanë ardhur si për Poloninë dhe Gjermaninë në Euro 2016. Dy përfaqësueset kanë fituar ndaj kundërshtarëve të tyre pa pësuar gol, duke u treguar si pretendentë për t’i zënë dy vendet kryesuese në grupin C.
Irlanda e Veriut bëri pikërisht atë çka bën normalisht një debutues në këtë veprimtari, duke humbur 0-1 ndaj Polonisë. Irlandezoveriorët u treguan tepër inferiorë, duke mos patur as zotërimin e duhur të topit, e duke mos krijuar as rastet e duhura për të shkuar tek goli. Vetëm dy goditje, e ato jashtë kuadratit të portës kundërshtare, janë mjaft pak për një skuadër europiani.
Ndërsa Polonia e meritoi plotësisht fitoren, e cila qe e para pas gjashtë ndeshjeve të luajtura në finalet e
europianëve. Qe njëkohësisht i pari takim ku polakët nuk pësonin gol.
Milik, me golin e tij në minutën e 51-të, do t’i jepte fitoren Polonisë. Vetëm 22 vjeç, ai u bë lojtari më i ri polak që shënon në finalet e kampionateve europiane.
Në takimin tjetër të mbrëmjes së djeshme, Gjermania e mposhti 2-0 Ukrainën. Por shifrat nuk tregojnë realitetin e asaj çka ngjau në fushë. Gjermanët u treguan të thyeshëm, dhe mund ta kishin pësuar në një numër rastesh.
Mesfushori i Realit të Madridit, Toni Kroos, qe vendimtar me lojën e tij në fitoren e gjermanëve, duke u shpallur dhe lojtari i ndeshjes.
Goli i parë do të shënohej nga një lojtar me origjinë shqiptare, Shkodran Mustafi. Ai do të realizonte të parin gol për të në 11 paraqitje me gjermanët.
E Schweinsteiger, që nuk luante prej muajsh, e ka thelluar rezultatin në minutën e 92-të, në të parin gol të tij në nivel ndërkombëtar që nga viti 2011.
Fitorja qe në vazhdën e historikut të Gjermanisë, që nuk ka humbur asnjëherë në ndeshjen hapëse në kampionatet europiane, duke fituar në to më shumë se çdo përfaqësuese tjetër.
Gjermania dhe Polonia do të ndeshen mes tyre në mbrëmjen e së enjtes. /tesheshi.com/
