Tentimi i institucioneve kosovare për ta shfuqizuar Gjykatën Speciale ka alarmuar jo pak shtetet e ndryshme të cilat kanë nisur të dërguarit e tyre në Kosovë për ta parandaluar iniciativën në fjalë.
Ambasada e Gjermanisë njofton se më 10 e 11 janar për vizitë në Kosovë do qëndrojnë një delegacion i përbërë nga i dërguari i posaçëm për Evropën Juglindore, Turqinë dhe shtetet e EFTA-s në Ministrinë Gjermane të Punëve të Jashtme, Christian Hellbach dhe shefi i Departamentit të Ballkanit Perëndimor të Ministrisë Franceze të Punëve të Jashtme dhe Evropiane, Thomas Bertin.
“Vizita zhvillohet në sfondin e shqetësimeve në Berlin dhe Paris lidhur me përpjekjet e fundit për të shfuqizuar ligjin mbi Dhomat e Specializuara dhe Zyrën e prokurorit të specializuar. Tema të tjera për t’u diskutuar përfshijnë domosdoshmërinë e vazhdimit të reformave, veçanërisht në fushën e sundimit të ligjit, demokracisë dhe qeverisjes së mirë, të cilat janë thelbësore për afrimin e mëtejshëm të Kosovës drejt Bashkimit Evropian”, thuhet në njoftimin për media.
Gjatë vizitës së tyre, ata do të takohen me presidentin Thaçi, kryeministrin Haradinajn si dhe me përfaqësuesit e partive politike dhe shoqërisë civile. /tesheshi.com/
