Duket e çuditshme, por Gjermania, pavarësisht sukseseve të panumërta në futbollin europian e botëror, ka një thembër Akili. E ajo është Italia, një skuadër që gjermanët nuk e kanë mundur asnjëherë në një Kupë Bote apo në një Europian.
Sonte luhet çerekfinalja e tretë e Euro 2016-tës, që i vë karshi pikërisht këto dy përfaqësuese. Gjermanët janë në kërkim të prishjes së traditës negative, e italianët duan të konfirmojnë momentin e tyre të mirë.
Hungarezi Viktor Kassai do ta gjykojë takimin që nis në orën 21:00 në Bordo, në “Stade Matmut-Atlantique”.
Gjermanët kanë eliminuar Sllovakinë në një të tetat, me një fitore të thellë, 3-0. Joachim Low duket optimist, çka e tregojnë dhe fjalët e tij, “Qëllimi ynë parësor është të fitojmë turneun.”
Ai thotë se pavarësisht traditës ndaj Italisë, në mendje ka vetëm fitoren, “Ne jemi besimplotë, sepse brenda këtij grupi ka shumë besim.”
Gjithsesi, ai e ka të qartë se ekipi që e fiton këtë sfidë bëhet pretendenti kryesor për ta fituar Europianin.
Përndryshe, Antonio Conte, i çmon shumë gjermanët, “Ata janë teknikë, të talentuar, fizikë dhe të organizuar. Mendoj se janë ekipi më i kompletuar në botë.”
Italia do të eliminonte Spanjën ditë më parë, por Conte është i mendimit se gjermanët janë shumë më të mirë. “Ky ekip është më i mirë se Spanja, sepse është kampion bote, e ka gjithçka që i duhet një ekipi të fortë.”
Në një miqësore më 29 mars të këtij viti, Gjermania fitonte 4-1 ndaj Italisë. Do të pasojë një tjetër fitore, do të prishet tradita negative për gjermanët? Apo sërish Italia do të bëjë të fortin? Gjithçka do ta mësojmë vetëm pak orë më vonë, në mbrëmjen e kësaj të shtune. /tesheshi.com/
