U deshën gati dhjetë vjet, por në fund studimi i historianit gjerman, Lutz Budrass mbi shfrytëzimin e mijëra njerëzve me punë të detyruar nga ana e Lufthansa-s në periudhën e nazizmit, porositur në vitin 1999 nga vetë kompania ajrore, ka dalë në qarkullim. Modalitetet e publikimit janë një nga çështjet që kanë nevojë për diskutim.
Hetimi i gjatë 116 faqe, u publikua si pjesë e një libri fotografik me 333 faqe mbi historinë e Luftahansa-s që kërkoi kompania. Një tekst i pasur me imazhe, ku fjalët “punë e detyruar” as nuk shfaqet, porn ë vend të saj përdoren “specialist” apo “punonjës të huaj”.
Kështu shkruajnë mediat që vënë në dukje se koha e publikimit të librit nuk duket e rastësishme: më 14 Mars do të dalë në libraritë gjermane një volum me mbi 700 faqe, i pamiratuar dhe i pambështetur nga kompania, e që cilësohet si hetimi i parë shkencor i plotë mbi historinë e Lufthansa-s mes viteve 1926 dhe 1955. Autori është i njëjtë me atë publikimit të autorizuar: Lutz Budrass.
Lufthansa duket se ka vendosur të ndërmarrë një rrugë tjetër nga ajo e shoqërive të tjera gjermane si Volkswagen apo Audi, që në vitet e fundit kanë porositur dhe publikuar studime të zgjeruara mbi historinë e tyre nën regjimin nazist.
Hetimi i cili iu besua Budrass-it në vitin 1999 duhej të dilte në vitin 2001, me rastin e 75-vjetorit të Lufthansa-s. Kështu të paktën kishte premtuar autori i porositur nga kompania, që në fund kishte bërë hapa pas dhe ishte kufizuar duke u shpërndarë falas kopje njerëzve që ishin shfaqur të interesuar për të pasur tekstin në fjalë.
Motivi i kësaj zmbrapsjeje ishte: bëhet fjalë për një studim shkencor, jo për një volum drejtuar publikut të gjerë. Ky shpjegim tingëllon shumë i veçantë në dritën e faktit që i njëjti studim tashmë është përfshirë në një libër plot me fotografi aeroplanësh, aeroportesh dhe shkrepje të tjera publicitare.
Gjatë luftës së dytë botërore Deutsche Luft Hansa, kompania nga e cila kindi në vitin 1955 Lufthansa e sotme, shfrytëzoi rreth 10 mijë persona me punë të detyruar, ku përfshiheshin edhe fëmijë. Kush rebelohej, rrihej dhe dërgohej në kampet e përqëndrimit. /tesheshi.com/
