Zyra Federale për Migrim dhe Refugjatë paralajmëron se në Gjermani do të ketë një rritje dramatike të numrit të refugjatëve. Burime qeveritare, të cituara nga gazeta “Handelsblatt” tregojnë se në Gjermani pritet të vijnë të paktën 650,000 ndoshta edhe 750.000 azilkërkues. Deri tani qeveria federale kishte përllogaritur një shifër rreth 450.000 refugjatë.
Në këto kushte, rritet mundësia për një kthim të shpejtë të të gjithë azilkërkuesve nga Ballkani, pasi kushtet në shtetet gjermane po përkeqësohen dita-ditës, mungojnë vendet për strehim ndërsa janë shtuar tensionet sociale.
Në këtë vazhdë është edhe deklarata e ministrit të Jashtëm gjerman, Valter Shtajnmajer, i cili kërkon përshpejtimin e procedurave për largimin e emigrantëve nga Maqedonia, Kosova e Shqipëria.
“Ky grup (emigrantësh nga Ballkani perëndimor) nuk ka gjasa të fitojë statusin e refugjatëve. Së këndejmi, është e nevojshme që me shpejtësi të miratohet vendim dhe të veprohet”, ka thënë shefi i diplomacisë gjermane për revistën Bild.
Shqipëria, Kosova dhe Maqedonia kërkojnë integrim në Bashkimin Evropian dhe pranimi i këtyre vendeve si të sigurta sa i përket respektimit të të drejtave të njeriut, sipas tij, mund të kontribuojë në drejtim të zgjidhjes së problemit me migracionin legal. /tesheshi.com/
