Sekretari i Shtetit për Çështje Evropiane në Ministrinë e Punëve të Jashtme të Gjermanisë, Michael Roth ka deklaruar sot se vendet e Ballkanit kanë perspektivë të qartë evropiane, pavarësisht nga Brexit. Këtë e vërteton edhe Samiti i ardhshëm për Ballkanin Perëndimor që pritet të mbahet në Paris.
“Për politikën e zgjerimit vlen kjo: të gjitha vendet e Ballkanit kanë perspektivë konkrete të anëtarësimit në Bashkimin Evropian. Ne presim shumë prej tyre, sidomos në fushën e sundimit të ligjit dhe demokracisë. Është në duart e këtyre vendeve që ato t’i përmbushin këto kërkesa”, tha Roth për DW.
“Ne me të gjitha forcat i mbështesim ato në këtë rrugëtim të vështirë dhe qëndrojmë prapa deklaratave dhe premtimeve tona. Konferenca e ardhshme e procesit të Berlinit pritet të mbahet në Paris. Me këtë iniciativë konkrete, ne edhe njëherë po vërtetojmë perspektivën evropiane të vendeve të Ballkanit Perëndimor, si dhe përfshirjen tonë në atë rajon”, ka thënë Roth. /tesheshi.com/
