Rreth 90 mijë njerëz janë urdhëruar të largohen nga shtëpitë e tyre dhe vendet e punës në dy qytete gjermane, për shkak të bombave të pashpërthyera që i përkasin periudhës nga Lufta e Dytë Botërore. Bombat u zbuluan pas disa punimeve të kryera në insfrastrukturë.
Mbi 21 mijë njerëz që jetojnë në rrezen prej një kilometri në qytetin perëndimor Koblenc, janë urdhëruar të largohen nga kjo hapësirë, ku specialistët deaktivizuan një bombë 500 kilogramëshe të Shteteve të Bashkuara.
Nga ana tjetër, 70 mijë banorë duhet të largohen në distancën prej 1.5 kilometri nga qyteti i Frankfurtit, ku autoritetet kanë planifikuar ta shkatërrojnë një bombë, e cila ishte hedhur nga Forca Ajrore Britanike gjatë Luftës së Dytë Botërore, që është tri herë më e madhe se ajo në Koblenc.
Operacioni në qytetin e Frankfurtit është përshkruar si operacioni më i madh i ndërmarrë nga Gjermania, prej përfundimit të Luftës së Dytë Botërore. /tesheshi.com/
