DEKRA Akademie është një kompani gjermane që trajnon dhe punëson qindra shqiptarë në Gjermani. Ajo është e vetmja rrugë zyrtare nëpërmjet së cilës të rinjtë shqiptarë mund të gjejnë kontrata të rregullta punësimi në vendin e zhvilluar europian.
Aktualisht janë janë rreth 1 mijë studentë që po trajnohen dhe 200 prej tyre janë punësuar në Gjermani.
Trajnimi është falas. Në këtë akademi mësohet gjuha gjermane dhe vetë organizata i lidh infermierët me kontrata pune në institucionet gjemane.
Sfida e kësaj kompanie është hapja e trajnimeve me sektorë të tjerë, kryesisht IT dhe sistemet e ngrohjes, u shpreh sot në Tiranë Nadim Salameh, përfaqësues i DEKRA-s.
Dietmar Metzger, administrator i DEKRA Akademie në Shqipëri i pyetur nga tesheshi.com se si nisi interesi për të marrë punonjës të kualifikuar nga vendi ynë tha se kërkesa kishte ardhur nga pala shqiptare, por tani janë vetë kompanitë gjermane që kërkojnë punonjës shqiptarë.
“Më duhet të pranoj se nuk ishte ideja jonë, por e Luan Bregasit. E takova kur ishte në Gjermani bashkë me Edi Ramën dhe ai na tha ejani në Shqipëri. Shqipëria është një vend i dashur dhe i vogël dhe ne erdhëm, edhe mund ta konfirmojmë që është një vend shumë i mirë, një vend i mirë për të qëndruar dhe për të mbështetur zhvillimin.
Mund të them që është surpriza e këtyre viteve. Cilësia e shqiptarëve, interesi i njerëzve, talenti i tyre, jam një fans i madh i Shqipërisë”– tha ai.
Pas infermierëve, DEKRA do të vijojë me kërkimin e profesionistëve të tjerë si IT apo specialistët e sistemeve të ngrohjes.
“Padyshim që kemi plane të tjera. Ne mësojmë 600 studentë në fushën e kujdesit shëndetësor dhe kemi plane që tani në vjeshtë të fillojmë me profesionet e IT-së dhe me sistemin e ngrohjes”– shtoi Metzger.
Punëdhënësit gjermanë kanë mbetur shumë të kënaqur me infermieret e punësuara nga Shqipëria.
“Klientët tanë gjermanë janë shumë të kënaqur me infermieret që vijnë nga këtu. Ato kanë bazat teorike shumë të forta edhe praktike, por gjithashtu ato kalojnë përmes disa programeve për t’u përgatitur mirë për në Gjermani”– thotë Nadim Salameh.
Sot DEKRA shpërdau certifikatat e një trajnimi me dhjetra të rinj që punojnë në sektorin e Hoteleri-Turizëm.
Irena Bakalli, drejtore ekzekutive në kompaninë DEKRA, për projektin e trajnimit në Hoteli-Turizëm dhe projekte të tjera, shprehet se me anë të këtyre trajnimeve po synohet futja e modelit dual gjerman në vendin tonë. Ky sistem nënkupton ndërthurjen e teorisë me praktikën në mënyrë që të nxjerrë punonjës të kualifikuar për tregun e punës, në Shqipëri dhe në Gjermani. /tesheshi.com/
