Dhjetëra mijëra njerëz dolën në rrugët e Berlinit dhe qyteteve të tjera gjermane të dielën për të protestuar kundër një plani të konservatorëve të opozitës dhe të krahut të djathtë për të kufizuar emigracionin.
Sipas policisë së Berlinit, rreth 160,000 njerëz u mblodhën në Portën e Brandenburgut, pranë Bundestagut, duke mbajtur pankarta ku shkruhej “Ne jemi mburoja, jo bashkëpunim me Alternativën për Gjermaninë (AfD)” dhe “Merz, shko në shtëpi, turp për ty”.
Në Gjermani, qytetarët dolën masivisht dje në rrugë për të protestuar kundër kalimit në të djathtë dhe bashkëpunimit mes kristiandemokratëve dhe partisë së ekstremit të djathtë Alternativa për Gjermaninë (AfD).
Friedrich Merz, kandidati i Unionit Kristian Demokrat (CDU) për kancelar në zgjedhjet e ardhshme, u përpoq të premten të kalonte propozimet kundër imigracionit në dhomën e ulët të Bundestagut, por ai nuk kishte shumicën.
Projektpropozimi përfshinte futjen e kufizimeve në ribashkimin e anëtarëve të familjeve të ndara të refugjatëve individualë, si dhe refuzimin më të shpeshtë të refugjatëve në kufijtë gjermanë.
Propozimet u mbështetën nga partia e ekstremit të djathtë Alternativa për Gjermaninë.
Gjermania do të mbajë zgjedhjet parlamentare në 23 shkurt, pasi koalicioni trepartiak i kancelarit Olaf Scholz u shemb në fund të vitit të kaluar për shkak të një mosmarrëveshjeje mbi mënyrën se si të forcohej ekonomia. /tesheshi.com/
