I dërguari special i Gjermanisë për Ballkanin Perëndimor, Manuel Sarrazin, i tha shtypit të Beogradit të enjten se Serbia nuk mund të bëhet anëtare e Bashkimit Evropian pa e njohur Kosovën, por edhe pa media të lira dhe demokraci.
Sarrazin ka theksuar për gazetën Nova qëndrimin “shumë të qartë” të Gjermanisë se deri në fund të normalizimit të marrëdhënieve ndërmjet Beogradit dhe Prishtinës, kur Serbia të vendosë për anëtarësim në BE, njohja e pavarësisë së Kosovës do të jetë pjesë e procesit.
I pyetur se kur do t’i paraqitet publikut propozimi franko-gjerman për zgjidhjen e statusit të Kosovës, i cili që atëherë është bërë një propozim evropian, Sarrazin sugjeroi se “është më mirë që fillimisht të krijohet një atmosferë besimi dhe mirëkuptimi” në të cilën liderët e të dyja palëve mund të flasin pa menduar se do të publikohet diçka.
Sarrazin tha se ai e kupton që “për qytetarët dhe të ardhmen e dy vendeve” është një “temë shumë e rëndësishme”.
Megjithatë, duke pasur parasysh se “propozimi nuk është publikuar, debati publik është reduktuar në thashetheme individuale dhe informacione që shpesh janë të pasakta”, theksoi diplomati gjerman.
Propozimi franko-gjerman për zgjidhjen e çështjes së Kosovës, i cili në Evropë quhet “një nga më seriozët” në dekadën e fundit të negociatave në nivelin më të lartë, është përmendur gjithnjë e më shpesh në opinion gjatë muajve të fundit, por thelbi i atij propozimi shpesh reduktohet në spekulime.
Sipas njohurive të deritanishme, liderët e Francës dhe Gjermanisë, Olaf Scholz dhe Emmanuel Macron, duan “normalizim të plotë të marrëdhënieve ndërmjet Serbisë dhe Kosovës”, që interpretohet si një dëshirë për njohje reciproke, ndoshta jo në një format të plotë de jure, por në atë masë sa Serbia e pranon realitetin e pavarësisë së Kosovës. /tesheshi.com/
