Gjergj Bojaxhi shpall kandidaturën si i pavarur për kryetar të bashkisë së Tiranës. Nga sheshi “Nënë Tereza”, ku së bashku me disa qytetarë bënë performancën e parë publike, Bojaxhi tha se nis një sfidë e vështirë të kthejmë Tiranën tek qytetarët.
“Tre vjet më parë, bashkë me një grup alpinistësh ngritëm flamurin shqiptar në pikën më të lartë të botës. Atje në majë të Everestit, kuptova se çdo sfidë është e përballueshme, çdo vështirësi është e tejkalueshme, kur njerëzit gjejnë brenda vetes vendosmërinë dhe kurajon. Me kete kurajo e vendosmëri jemi sot para jush për të nisur një sfidë të vështirë: kthimin e Tiranës tek qytetarët.
Optimizmi dhe entuziazmi ynë është më i madh se vështirësia e kësaj sfide. Sepse ne dimë një gjë shumë të rëndësishme.
Dimë që ne, të zhgënjyerit nga partitë dhe bizneset e tyre, jemi shumë më tepër se ata që përfitojnë nga to. NE, që nuk gjejmë në Tiranë siguri, qetësi, ajër të pastër, rruge të lira, shkolla pa turne, jemi shumë më tepër se ata që votojnë symbyllur partitë e vjetra të tranzicionit. NE jemi shumica, ndaj ju ftojmë të gjithëve ta bashkojmë këtë shumicë për ta rimarrë qytetin në duart tona.
NE TIRANA, ne shumica, do ta bëjmë këtë qytet më të gjelbër për fëmijët, më të hapur për këmbësorët, më tërheqës për sipërmarrësit, më motivues për nxënësit, më të jetueshëm për banorët dhe më dinjitoz për të gjithë”. Kjo ishte deklarata e plotë e shpalljes së kandidaturës.
Gjergj Bojaxhi është një intelektual i njohur i kryeqytetit, dhe një nga figurat moderatore të Partisë Demorkatike. U afrua në fillim me KOP-in në vitin 2005 e më pas u emërua zv.ministër i Ekonomisë dhe Energjetikës. Emërohet më pas në krye të KESH ku spikat si menaxher i sukseshshëm. Largohet ndërkohë që garon për kreun e PD-së së Tiranës, por Berisha nuk e lejon të zhvillojë garë të ndershme. Më pas largohet nga PD pasi nuk iu ofrua asnjë mundësi për të demonstruar aftësitë e tij.
(tesheshi.com)
