Spanja vinte në takimin e fundit përgatitor pas një fitoreje të thellë, 6-1, në miqësoren ndaj Koresë së Jugut. Spanja nuk kishte humbur që nga 31 marsi i vitit të shkuar, ku po në një miqësore do t’i dorëzohej, 0-2, Holandës.
Humbja e mbrëmshme 0-1 ktheu në kujtesë Spanjën e dy viteve të shkuara, ku në Botërorin e Brazilit bënte atë paraqitje të shëmtuar. Fitorja aksidentale e Gjeorgjisë ka bërë që për herë të parë të bien zilet e alarmit në skuadrën e Del Bosque-s.
Spanjollët dolën mbrëmë në fushë me një formacion pak a shumë të plotë, ku binte në sy De Gea në portë, si një paralajmërim se ai do të jetë zgjedhja e parë në Europian, e jo Casillas.
Zotërimi i topit do të ishte tërësisht në favor të vendasve, që e patën lojën në kontroll të tyre në 76 për qind të kohës krahasuar me 24 përqindëshin e përfaqësueses së 137 në renditjen botërore.
11 goditje nga këndi e 15 goditje në portë do të rezultonin të padobishme për spanjollët karshi një Gjeorgjie të vendosur për të befasuar.
Dhe kjo gjë ndodhi në minutën e 40-të, kur Okriashvili shënoi në portën e Spanjës pas një hezitimi të mbrojtjes e një pasimi të dobët të Jordi Alba-s.
Spanjës i mungoi krijueshmëria dhe goditja finale në të fundit takim para nisjes së Euro 2016-tës. Skuadra e Vicente Del Bosque-s është në kërkim të një trofeu të tretë radhazi, e shkon në Francë si kampione në fuqi, por humbja e mbrëmshme ka hedhur dyshime mbi potencialin e vërtetë të saj.
E gjendur në grupin D të Europianit, Spanja do ta luajë takimin e parë të hënën e ardhshme, kur do të përballet në Tuluzë me Çekinë. Turqia dhe Kroacia do të jenë dy kundërshtarët e tjerë në ditët e mëpastajme. /tesheshi.com/
