Duke iu drejtuar ditës së dytë të Samitit të Ndryshimit të Klimës, Presidenti i SHBA Joe Biden tha se vendet duhet të investojnë shumë më tepër në energjinë e pastër, njoftoi Anadolu Agency (AA).
“Të gjitha vendet në rrugën e shkarkimeve neto zero duhet të investojnë në teknologji të reja për energji të pastër,” tha Biden gjatë një fjalimi në një sesion të titulluar “Mundësitë Ekonomike për Veprimin Klimatik”.
Ai shprehu mirënjohje për të gjithë udhëheqësit botërorë që morën pjesë në samit.
“Unë besoj se kemi bërë një përparim shumë të mirë deri më tani. Unë jam mirënjohës të gjithë udhëheqësve që kanë njoftuar angazhime të reja për të na ndihmuar të përballemi me ndryshimin e klimës që përbën një kërcënim ekzistencial për ne.”
Biden theksoi se samiti është një fillim i mirë për Konferencën e Kombeve të Bashkuara (KB) mbi Ndryshimin e Klimës që do të mbahet në Glasgow në nëntor të këtij viti.
Ai theksoi nevojën për të investuar në inovacionin e industrisë në të gjithë botën me qëllim të luftimit të ndryshimeve klimatike në mënyrë më efektive.
“Një teknologji nuk është një zgjidhje për ndryshimin e klimës në vetvete. Për atë arsye, çdo sektor duhet të investojë në inovacion,” tha Biden.
Në fund, ai theksoi se mbështet fuqimisht thirrjen e Presidentit rus Vladimir Putin në fjalimin e djeshëm në samit, kur tha se bota duhet të bashkëpunojë në zgjidhjen e problemit të ndryshimit të klimës, duke shtuar se vendet e tjera duhet të marrin një pozicion të tillë.
Samiti mbi ndryshimin e klimës në formatin online, i organizuar nga Shtetet e Bashkuara dhe i ndjekur nga më shumë se 40 udhëheqës botërorë, filloi të enjten.
Fokusi gjatë takimit dy-ditor është në uljen e emetimeve të karbonit gjatë dhjetë viteve të ardhshme, promovimin e aktorëve jo-shtetërorë që punojnë në përfitimet ekonomike të veprimit të klimës, veçanërisht përmes punësimit, teknologjisë së transformimit dhe ndryshimit global të klimës.
Samiti u ndoq nga Presidenti kinez Xi Jinping, Presidenti rus Vladimir Putin, Presidenti turk Rexhep Tajip Erdogan, Presidenti i Këshillit Evropian Charles Michel, kreu i Kishës Katolike Romake, Papa Françesku dhe drejtues të tjerë të shumtë. /tesheshi.com/
