Në javën e ardhshme pritet që Bosnja t’i kërkojë gjykatës më të lartë të OKB-së që ta rishohë vendimin e saj i cili e nxjerr të larë Serbinë nga akuzat për gjenocid në vitet ’90 të shekullit të shkuar.
Apelimi do të bëhet para datës 26 shkurt, kur edhe skadon afati dhjetëvjeçar.
Nismën për apelimin e ka bërë të ditur Bekir Izetbegoviç, anëtari i presidencës trepalëshe të Bosnjë-Hercegovinës. Ai deklaroi një ditë më parë se apelimi do të bëhej nga përfaqësuesit ligjorë të vendit.
“Çdokush ka nevojë për të vërtetën, edhe ata që e kundërshtojnë atë; një e vërtetë që do të shkruhet nga gjykatës ndërkombëtarë, me përvojë dhe të paanshëm,” qenë fjalët e tij.
Zyrtarët serbë të Bosnjës bënë të ditur me këtë rast se nisma do të nxisë një krizë të re politike.
Gjykata Ndërkombëtare e Drejtësisë e nxori të larë Serbinë në vitin 2007 nga përgjegjësia e drejtpërdrejtë për gjenocid.
Kjo gjykatë gjeti një akt të vetëm gjenocidi gjatë luftës së Bonjës në vitet 1992-1995, atë të masakrës së Srebrenicës, ku nga forcat serbo-boshnjake u vranë rreth 8.000 muslimanë boshnjakë.
Gjykata Ndërkombëtare e Drejtësisë doli në përfundimin se Serbia kishte shkelur ligjin ndërkombëtar me dështimin për t’i parandaluar vrasjet! /tesheshi.com/
