Janë dakord të gjithë me atë që thuhet se “nuk të pranojnë si profet në vendlindje”, por për kryeministrin spanjoll, Mariano Rajoy thënia ka shkuar shumë përtej. Pontevedra, qyteti i lindjes së kryeministrit spanjoll e ka dekretuar qytetarin e shquar të tij, “person të padëshiruar”.
Këshilli bashkiak në qendrën galiciane të vendit, e që drejtohet nga nacionalistët, aleatë të Podemos, votoi një rezolutë ku censuron kryeministrin, të cilin e quan fajtor, me votë të shumicës, se ka shtuar afatin deri në 60 vjet të një fabrike letre që konsiderohet shumë ndotëse për mjedisin.
Rajoy në të vërtetë ka lindur në Santiago të Kompostelës, por gjithnjë ka njohur Pontevedrën si vendlindje të tij.
Dekreti, sidoqoftë, nuk ka efekte praktike e kryeministri mund të vizitojë shtëpinë e tij kur të dojë, por është më shumë një shpallje qytetare. Sigurisht, që bëhet fjalë edhe për një sinjal largësie domethënëse mes Rajoy dhe tokës ku ka lindur.
Nuk është se gjërat janë të lidhura, por herën e fundit që lideri i qendrës së djathtë spanjolle ka vizituar këto anë, (për arsye politike) gjërat kanë shkuar edhe më keq: në dhjetor gjatë një turi takimesh elektorale për qendrën e djathtë, një djalosh e sulmoi atë me grusht në fytyrë.
Motivet e hapërdara të agresorit (e godita se Mariano merr dy rroga), bënë që askush të mos nxitonte në konkluzione politike të gjestit apo në analiza. Sot, në të vërtetë, titujt e shumë gazetave janë marrë me të duke e cilësuar vendimin e këshillit bashkiak si “grushtin e dytë” për Mariano Rajoy. Përgatiti: Juli Prifti – /tesheshi.com/
