Ushtruesi i detyrës së Shefit të Shtabit të Përgjithshëm të ushtrisë turke, general-armate Umit Dundar, ka deklaruar se ka qenë ushtria bashkë me institucionet demokratike që ka ndaluar puçin ndaj shtetit.
Gjenerali i emëruar për të pastruar ushtrinë, në një deklaratë që ka dhënë në aeroportin e Stambollit ku ndodhet për të stabilizuar situatën, tregoi orët e grushtit të shtetit ku shumë prej gjeneralëve u izoluan pasi shtabi i përgjithshëm ishte i tëri peng i puçistëve.
“Zinxhiri komandues ishte ndërprerë, por një pjesë e krerëve ushtarakë i mbajtën lidhjet direkte me presidentin dhe kryeministrin. Për arsye sigurie të gjitha lidhjet u mbajtën me Kryeministrin Binali Yildirim.”, tha ai.
Udar ka nisur pastrimin e ushtrisë njësi për njësi, duke filluar nga lart.
Ai tha se Forcat e Armatosura janë me njerëzit, me popullin dhe ka treguar më pas identikitin e atyre që morën pjesë në puç.
“Ushtarakë të gradave të ndryshme brenda Forcave të Armatosura Turke (TSK) kanë ndërmarrë një tentativë për grusht shteti. Shumë komandantë (gjeneralë) janë transferuar në adresa të paditura duke u mbajtur peng.
Ushtria turke këtë tentativë për grusht shteti e kundërshtoi që në momentin e parë.
Orvatja është ndaluar brenda demokracisë nga Presidenti, Kryeministri dhe ministrat tanë.
Krah për krah me shtetin dhe popullin e saj Ushtria e pengoi këtë tentativë për grusht shteti”, tha gjenerali Dundar, i cili deri sot ka mbajtur postin e komandantit të Armatës së Parë të ushtrisë turke.
Në fakt, siç tha kryeministri Yildirim, komandantët e njësive tokësore, ajrore dhe detare, si dhe njësitë speciale kanë qenë me qeverinë dhe nuk kanë bashkëpunuar me puçistët që kanë përdorur një bazë të shtabit të përgjithshëm dhe disa mjete të marra në disa depo.
“Gjatë kësaj nisme është dëshmuar çmenduria e një grupi që bombardon parlamentin e vet.
Ky popull nuk ka për ta harruar kurrën e kurrës këtë poshtërsi. I shprehim mirënjohjen popullit tonë për qëndrimin e matur. Koha e grushteve të shtetit dhe juntave ushtarake në Turqi ka perënduar plotësisht”, tha i sapoemëruari në krye të ushtrisë.
Dundar theksoi se ushtria do të pastrohet e gjitha nga elementët e strukturës paralele, ndërsa shtoi: “Askush që tradhton shtetin dhe popullin e tij nuk do t’i shpëtojë dot ndëshkimit. Forcat e Armatosura Turke do të vazhdojnë të punojnë si një institucion nën urdhrat e shtetit, ashtu siç duhet të ndodhë në një shtet demokratik dhe ligjor. U shpreh mirënjohjen të gjitha partive politike dhe mediave që i dolën për zot demokracisë dhe vullnetit kombëtar”.
Përgatiti Y.Pata – /tesheshi.com/
