Gjenerali Kirill Budanov, kreu i shërbimit të inteligjencës ushtarake të Ukrainës, tha se lufta në vendin e tij po i vinte fundi. Ai pretendon se rusët nuk kanë më “potencial sulmues“, që do të thotë se “ata përfundimisht do të detyrohen të tërheqin forcat e tyre”.
Budanov, në një intervistë për gazetën franceze Le Monde, akuzoi Rusinë se po vazhdon të shtrembërojë faktet. Duke iu përgjigjur pyetjes për pritjet e tij për të ardhmen e kësaj lufte, ai u përgjigj se “jeta do të jetë më e lehtë”.
Për mënyrën se si do të zhvillohet situata më tej, ai tha se nuk ka kompromis për një gjë, e ai është se nuk do të pranojë asnjë zgjidhje që nuk rikthen integritetin territorial të Ukrainës brenda kufijve të saj të njohur ndërkombëtarisht të vitit 1991. “Çdo opsion tjetër është i papranueshëm për ne. Çdo lëshim territorial mund të çojë vetëm në një konflikt të ri më vonë,” tha ai.
“Rusët nuk do të fitojnë”
Duke iu përgjigjur pyetjes për shanset e suksesit të ofensivës aktuale ruse në Donbass, oficeri ukrainas e përjashtoi këtë mundësi, duke thënë: “Rusët nuk do të fitojnë. Ata kanë një vit që përpiqen të pushtojnë provincat Donetsk dhe Luhansk dhe deri më tani nuk ia kanë dalë dot”. “Edhe nëse kufizohemi vetëm me Bakhmut, të cilët kanë sulmuar që nga korriku i kaluar dhe thonë se pothuajse e kontrollojnë, ne shohim se ata ende nuk kanë arritur ta bëjnë këtë dhe sot jemi në shkurt të 2023-ës”, shtoi ai.
Budanov parashikon se Rusia përfundimisht do të duhet të tërheqë forcat e saj nga territori ukrainas nën presionin ushtarak ukrainas, dhe nën presionin e kalkulimeve politike brenda Rusisë, si dhe të diplomacisë ndërkombëtare, gjë që do të ndodhë së shpejti, sepse, sipas tij, në të kundërtën, vjen kolapsi i sistemit.
Ai shton se bota nuk ka nevojë për Federatën Ruse, e cila kërcënon sigurinë botërore, siç ekziston sot. Ai thekson se Rusia aktualisht nuk ka asgjë për t’i ofruar botës përveç kërcënimit të armëve bërthamore, të cilën askush nuk e dëshiron.
Për të ardhmen e Ukrainës pas luftës, Budanov tha se pret që ajo të bëhet një qendër e re e ndikimit rajonal. /tesheshi.com/
