Ndërsa prej muajsh e vitesh tashmë të gjitha agjencitë mediatike botërore raportojnë e analizojnë kërcënimet që vijnë nga organizata ekstremiste terroriste Shteti Islamik, që së fundmi kreu dy sulme të përgjakshme edhe në Tunizi e Jemen, ish-drejtori i CIA-s, gjenerali David Petraeus, i cili drejtoi trupat e koalicionit gjatë luftës në Irak, ka deklaruar se kërcënimi më i madh për këtë vend nuk është IS-i. Sipas tij, milicitë shiite të mbështetura nga Irani janë “kërcënimi kryesor” për stabilitetin afatgjatë të Irakut. “Këto milici, shumë prej të cilave të stërvitura dhe të financuara nga Irani, kanë luajtur një rol kryesor në përpjekjet për të dëbuar IS-in nga Siria, por gjithashtu ato janë akuzuar për krime lufte pasi kanë vrarë jo vetëm luftëtarë të Shtetit Islamik, por edhe civilë sunitë”, ka deklaruar Petraeus. Deklarata e tij, që ngjan si një ndërrim i papritur kursi në politikën amerikane, është bërë në një intervistë për “Washington Post”. Kështu, gjenerali i famshëm me 4 yje ka shtuar se, nga njëra anë këto grupe kanë qenë pjesë e përpjekjeve për të shpëtuar Irakun, por që mund të kthehen në rrezikun më të madh nëse popullsia arabo-sunite e vendit kupton se ka në dorë më tepër suksesin e Irakut, sesa dështimin e tij. “Në një plan afatgjatë, milicitë shiite të mbështetura nga Irani mund të shfaqen si një pushtet i përhershëm në vend, pasi nuk do t’i përgjigjen qeverisë së Bagdadit, por asaj të Teheranit”, ka vijuar Petraeus. Komentet e tij vijnë në një kohë kur strategjia e administratës amerikane për të mposhtur IS-in po shqyrtohet në Kongres, me ligjvënësit që debatojnë se si të mbajnë luftën kundër IS-it në legjislacion, për të autorizuar zyrtarisht përdorimin e forcës ushtarake. Javën e kaluar, në një seancë dëgjimore me zyrtarët më të lartë të sigurisë kombëtare, kongresmenët theksuan shqetësimin e tyre për rritjen e influencës së Iranit në rajon dhe ndikimin e këtij vendi për sigurinë afatgjatë.
Edhe Jemeni kërkon ndalimin e ndikimit iranian në vend
Duket se në të njëjtën linjë po shkojnë edhe qeveritë e disa vendeve arabe, ndër të cilët edhe Jemeni, i goditur dy ditë më parë nga një sulm i përgjakshëm terrorist, i ndërmarrë nga militantët e IS-it, që mori jetën e 135 vetëve në kryeqytetin Sana. Vetëm një ditë pas masakrës, Presidenti i Jemenit, Abedrabbo Manosur Hadi, ka shprehur përkushtim për ta luftuar ndikimin e Iranit në Jemen, pasi i ka akuzuar milicitë shiite Huthi për importimin e ideologjisë së Iranit. Në fjalimin e djeshëm televiziv me këtë rast, Hadi tha se “do ta ngrejë sërish flamurin e Jemenit” në bazën veriore të pjesëtarëve Huthi “në vend të flamurit iranian”. Një grup, që pretendon se është dega e grupit militant, Shteti Islamik në Jemen, mori përgjegjësinë me anë të disa mesazheve audio për sulmet e ndodhura në Sana, kryeqytetin e Jemenit, i cili prej muajsh po vuan trazirat me sfond religjioz dhe rrezikohet seriozisht nga një skizmë fetare brenda komunitetit mysliman, ku në qendër të saj gjenden sunitët dhe shiitët e mbështetur nga Irani. Nga ana tjetër, po dje, kryengritësit Huthi kanë bërë thirrje për të luftuar forcat besnike të presidentit të rrëzuar Hadi, që po qëndron në qytetin jugor Aden, pasi u largua nga arresti shtëpiak. Njëherësh, burime të sigurisë në Jemen thanë se personeli ushtarak i Shteteve të Bashkuara, i vendosur në një bazë ajrore në pjesën jugore të Jemenit, është evakuuar për shkaqe sigurie.
