“Çdo ditë e kaluar në një luftë që ka humbur qëllimin e saj i zbraz aftësitë tona dhe shkatërron vendin tonë. Ushtria është në kolaps, ekonomia e Izraelit është në kolaps.”
Gjeneralmajori izraelit në pension Yitzhak Brik tha se Hamasi ende kontrollon 80 për qind të tuneleve në Rripin e Gazës, raporton Anadolia.
Në një artikull për gazetën izraelite Maariv, Brik deklaroi se “Tel Avivi është po aq larg nga mposhtja e Hamasit sa Lindja është nga Perëndimi”.
“Çdo ditë e kaluar në një luftë që ka humbur qëllimin e saj i shter aftësitë tona dhe e shkatërron vendin tonë. Ushtria është në kolaps, ekonomia e Izraelit po shembet, ne po humbasim kontaktet me botën dhe fuqia jonë kombëtare është dëmtuar rëndë”, tha ai.
Duke vënë në dukje se ushtria izraelite nuk mund t’i arrijë qëllimet e saj, Brik tha se forca tokësore e ushtrisë izraelite është dobësuar sepse nuk mund të zëvendësojë trupat që luftuan pa pushim për muaj të tërë dhe paguanin një çmim të lartë me luftëtarë të vdekur dhe të plagosur.
Ky gjeneral izraelit në pension tha se ushtria izraelite u tërhoq nga rajonet ku ndodheshin për shkak të mungesës së ushtarëve dhe bastisjeve të vazhdueshme.
Më shumë se 37,500 palestinezë janë vrarë në Rripin e Gazës që nga 7 tetori i vitit të kaluar, shumica prej tyre gra dhe fëmijë, dhe rreth 86,000 janë plagosur, sipas autoriteteve lokale shëndetësore.
Izraeli është akuzuar për gjenocid në Gjykatën Ndërkombëtare të Drejtësisë, vendimi i fundit i së cilës urdhëroi autoritetet izraelite të ndalonin menjëherë operacionin e tyre ushtarak në qytetin jugor të Rafahut. /tesheshi.com/
