Gjenerali i lartë rus Sergei Surovikin, zëvendëskomandanti i operacioneve ushtarake ruse në Ukrainë, i cili dyshohet se kishte dijeni për rebelimin e Wagner-it dhe udhëheqësit të tij Yevgeny Prigozhin, nuk është parë që kur shpërtheu rebelimi i armatosur të shtunën ku ai bëri thirrje për t’i dhënë fund rebelimit.
Sergei “Armageddon” Surovikin njihet ndryshe për lidhjet e tij të ngushta me Prigozhin. Në fillim të këtij viti, ai u hoq nga pozita e komandantit suprem të operacioneve në Ukrainë – gjë që Prigozhin e kritikoi – por ai ruajti ndikimin e tij në kryerjen e operacioneve të luftës.
Nuk dihet se ku ndodhet
Kanali me ndikim rus pro-luftës Telegram Ribar deklaron se Surovikin u ndalua në kuadër të hetimeve, domethënë se ai ishte duke u marrë në pyetje. “Surovikin nuk është parë që nga e shtuna – nuk dihet me siguri se ku është gjenerali ‘Armageddon’. Ekziston një version që ai po merret në pyetje”, raportoi kanali, siç raportohet nga Sky News.
Inteligjenca amerikane ka thënë më parë se Surovikin dinte për planet e Prigozhin për t’u rebeluar kundër udhëheqjes ushtarake ruse, sipas New York Times.
“Ne thamë dje se ai duhet të mbahet nën vëzhgim, pasi duhet të jetë në rrathana mjaft të vështira,” tha analisti i mbrojtjes dhe sigurisë në Sky News, Michael Clarke.
“Ajo që do të ndodhë me këtë njeri do të jetë shumë interesante. Ai nuk është shfaqur që kur lëshoi një deklaratë të shtunën më 24 qershor duke u kërkuar njerëzve të Wagner-it të kthehen në njësitë e tyre ushtarake” shtoi ai.
“Gjenerali Armagedon”, siç e quajtën mediat ruse, dyshohet se e dinte se lideri i mercenarëve famëkeq po planifikonte një rebelim kundër udhëheqjes ushtarake të Moskës, raportoi të martën më 27 qershor New York Times dhe agjencia Reuters.
New York Times citon zyrtarë amerikanë të njohur me inteligjencën amerikane për rebelimin e Prigozhin dhe thotë se zyrtarët “po përpiqeshin të zbulonin nëse Surovikin, ish-komandanti i lartë rus në Ukrainë, ndihmoi në planifikimin e veprimeve të Prigozhin fundjavën e kaluar”.
Prigozhin fluturoi në mërgim në Bjellorusi të martën (27 qershor) sipas një marrëveshjeje që i dha fund një rebelimi të shkurtër nga luftëtarët e tij gjatë fundjavës, ndërsa presidenti Vladimir Putin vlerësoi forcat e tij të armatosura për atë që ai tha se kishte parandaluar një luftë civile.
New York Times raportoi se komandantët amerikanë thanë gjithashtu se kishte shenja se gjeneralë të tjerë rusë mund të kenë mbështetur Prigozhin. Pentagoni ende nuk i është përgjigjur kërkesës së Reuters për koment. Kremlini dhe Ministria ruse e Mbrojtjes gjithashtu nuk iu përgjigjën pyetjeve të Reuters.
Surovikin u vu në krye të operacioneve në Ukrainë në tetor të vitit të kaluar, por në janar ministri rus i Mbrojtjes Sergei Shoigu emëroi shefin e Shtabit të Përgjithshëm Valery Gerasimov për të mbikëqyrur fushatën ushtarake në Ukrainë dhe Surovikin u bë zëvendësi i tij.
Para fillimit të rebelimit, Prigozhin ishte zemëruar me Shoigu dhe Gerasimov për muaj të tërë, duke i akuzuar ata për keqpërdorim të luftës dhe mungesën e mbështetjes ushtarake për luftëtarët e Wagner-it, veçanërisht për furnizimin e supozuar të pamjaftueshëm të municioneve për forcat e tij.
Surovikin i kërkoi Grupit Wagner të braktiste rebelimin e tij kundër udhëheqjes ushtarake dhe të kthehej në bazat e tyre pak përpara se Prigozhin të udhëhiqte luftëtarët e tij në atë që ai e quajti një “marshim për drejtësi” drejt Moskës.
Zëdhënësi i Kremlinit Dmitry Peskov iu përgjigj pyetjes së një gazetari në lidhje me raportin e New York Times më herët të martën. “Tani do të ketë shumë spekulime, thashetheme dhe kështu me radhë rreth këtyre ngjarjeve. Unë mendoj se ky është një shembull i tillë,” tha Peskov, raportoi The Guardian. /tesheshi.com/
